खोज

काठमान्डौ, १७ मंसिर ।

निर्वाचन आयोगले आगामी राष्ट्रिय सभा निर्वाचनका लागि सम्पूर्ण कार्यक्रम स्वीकृत गरेको छ । आयोगका अनुसार पुस १९ गते बिहान १० बजेदेखि ११ बजेसम्म मतदाता नामावली प्रकाशन गरिनेछ । सो नामावलीमा दाबी–विरोध तथा निवेदनहरूको छानबिन पश्चात् अन्तिम मतदाता नामावली पुस २२ गते बिहान ३ बजेदेखि ४ बजेसम्म प्रकाशन गरिनेछ ।

उम्मेदवारको मनोनयन पत्र दर्ता पुस २३ गते बिहान १० बजेदेखि दिउँसो ३ बजेसम्म हुनेछ । पुस २४ गते बिहान १० बजेदेखि दिउँसो ४ बजेसम्म उम्मेदवारको विरोधमा उजुरी पेश गर्न सकिने छ । उम्मेदवारले नाम फिर्ता लिन पुस २७ गते बिहान १० बजेदेखि दिउँसो १ बजेसम्म समय पाउनेछन् भने सोही दिन दिउँसो १ बजेदेखि २ बजेसम्म अन्तिम उम्मेदवार नामावली प्रकाशन गरिनेछ ।

पुस २८ गते बिहान १० बजेदेखि दिउँसो १ बजेसम्म उम्मेदवारलाई निर्वाचन चिन्ह सम्बन्धित निर्वाचन अधिकृतको कार्यालयबाट प्रदान गरिने व्यवस्था रहेको छ ।

निर्वाचन आयोगले माघ ११ गते बिहान ९ बजेदेखि दिउँसो ३ बजेसम्म सम्बन्धित मतदान केन्द्रमा मतदान सम्पन्न गराउने कार्यक्रम पनि तय गरेको छ ।

फागुन २० मा राष्ट्रिय सभाका १९ सदस्यको कार्यकाल सकिँदैछ । कार्यकाल सकिन लागेका सदस्यमध्ये बामदेव गौतम राष्ट्रपतिबाट मनोनित हुन् भने बाँकी १८ पदका लागि निर्वाचन हुन लागेको हो ।

प्रदेशअनुसार निर्वाचन हुने सदस्य संख्यामा कोशी प्रदेशबाट ३, मधेश प्रदेशबाट ४, बागमती, गण्डकी, कर्णाली र सुदूरपश्चिमबाट प्रत्येक २, र लुम्बिनी प्रदेशबाट ३ सदस्य निर्वाचित हुनेछन् ।