खोज

काठमान्डौ, १७ मंसिर ।

सञ्चार तथा सूचना प्रविधिमन्त्री तथा सरकारका प्रवक्ता जगदिश खरेलले अपांगता भएका व्यक्तिहरूको हक–अधिकार सुनिश्चित गर्न सरकार पूर्ण रूपमा प्रतिबद्ध रहेको बताएका छन् । अपांगता भएका व्यक्तिहरूको अन्तर्राष्ट्रिय दिवसका अवसरमा बुधबार काठमाडौंमा आयोजित प्रभातफेरीपछि सभालाई सम्बोधन गर्दै मन्त्री खरेलले उक्त धारणा प्रस्तुत गरेका हुन् ।

उनका अनुसार वर्तमान सरकारको कार्यकाल छोटो भए पनि अपांग महासंघसँग निरन्तर छलफल गर्दै आवश्यक ऐन तथा कानुन निर्माण अघि बढाइनेछ । उनले भने, “यो सरकार छ महिनाभित्र निर्वाचन गर्ने म्यान्डेटका साथ गठन भएको हो । त्यसैले जसरी भए पनि चुनाव सम्पन्न गरिन्छ । सरकार निर्वाचनका लागि आवश्यक पूर्वाधार र वातावरण तयार गरिसकेको छ ।”

अपांगता भएका व्यक्तिहरूका हक–अधिकार प्रवर्द्धन तथा संरक्षणका उद्देश्यले संयुक्त राष्ट्रसंघको पहलमा १९९२ देखि प्रत्येक वर्ष डिसेम्बर ३ मा ‘अपांगता भएका व्यक्तिहरूको अन्तर्राष्ट्रिय दिवस’ विश्वव्यापी रूपमा मनाइँदै आएको छ ।

यस अवसरमा महिला, बालबालिका तथा जेष्ठ नागरिक मन्त्रालय, राष्ट्रिय अपांग महासंघसहित विभिन्न संघ–संस्थाले काठमाडौंमा प्रभातफेरी आयोजना गरेका थिए । प्रभातफेरीपछि भृकुटीमण्डपमा विशेष सभा सम्पन्न गरिएको थियो ।