खोज

काठमान्डौ, १७ मंसिर ।

नेकपा माओवादी केन्द्र कर्णाली प्रदेश सभा संसदीय दलका नेता राजकुमार शर्माको राजीनामा स्वीकृत गरिएको छ । बुधबार बसेको दलको बैठकले उनीबाट प्राप्त राजीनामा स्वीकृत गरेको प्रदेश सभा सदस्य रणसिंह परियारले जानकारी दिए ।

प्रमुख सचेतक कृष्णबहादुर जिसीको अध्यक्षतामा बसेको बैठकले छिट्टै नयाँ संसदीय दल नेता चयन गर्ने निर्णय पनि गरेको छ । नेता शर्माले बिहीबार बिहान ह्वाट्सएपमार्फत प्रमुख सचेतक जिसीलाई सम्बोधन गर्दै राजीनामा पठाएका थिए। राजीनामा पत्रमा उनले राजीनामाको कारण भने उल्लेख गरेका छैनन् ।

रुकुम पश्चिम (ख) बाट निर्वाचित शर्मा कर्णाली प्रदेशका पूर्वमुख्यमन्त्री समेत हुन् । उनी माओवादी केन्द्रका उपाध्यक्ष जनार्दन शर्माका भाइ पनि पर्छन् ।

पछिल्लो समय उपाध्यक्ष जनार्दन शर्मा प्रगतिशील लोकतान्त्रिक पार्टीमा प्रवेश गरेपछि राजकुमार शर्माले दल नेतृत्वबाट अलग हुने निर्णय गरेको माओवादी केन्द्रका एक सांसदले बताए ।

कर्णाली प्रदेश सभामा ४० जना सदस्य छन्—नेपाली कांग्रेस १५, माओवादी केन्द्र १३, एमाले १० तथा एकीकृत समाजवादी र राप्रपा १–१ । जनार्दन शर्मा एकीकृत समाजवादीसँग मिलेर बनेको नेपाली कम्युनिस्ट पार्टीतर्फ लागे पनि माओवादी केन्द्र पक्षका १३ सांसद यथावत् रहने जनाइएको छ ।

बुधबारको बैठकमा राजीनामा दिएका शर्मा बाहेक माओवादी केन्द्रका सबै सांसद सहभागी थिए । बैठकमा माओवादी केन्द्र कर्णाली प्रदेश इन्चार्ज कालीबहादुर मल्ल र एकीकृत समाजवादीकी सांसद कल्याणी खड्का पनि उपस्थित थि ए।

यसअघि कर्णालीमा जनार्दन शर्मा पक्षधर समूहको मजबूत पकड रहँदा १३ मध्ये ११ जना सांसद उनी पक्षमा थिए । तर जनार्दन शर्मा पार्टी छोडेपछि उनको पक्षमा राजकुमार शर्मा मात्र उभिएका छन् ।