खोज

गुल्मी, १६ मंसिर ।  

गुल्मी, पाल्पा र स्याङजाको सङ्गम स्थल रिडीमा रहेको कालीनदिमा स्नान गर्न आउनेको सङ्ख्यामा वृद्धि हुँदै गएको छ ।

कालीगण्डकी नदिमा स्नान गर्नाले अन्जानमा गरेका पापहरू नष्ट हुने धार्मिक मान्यता कायम रहेकाले यहाँ नदी स्नान गर्न आउनेको सङ्ख्यामा वृद्धि हुँदै गएको हो । नवलपरासीबाट रिडीमा स्नान गर्न आएका  खगी पाण्डेले कालीगण्डकी नदीमा स्नान गरी ऋषिकेश मन्दिरको दर्शन गर्नाले मनले चिताएको कुराहरू पूरा हुने मान्यता रहेकाले यहाँ आएको बताएका छन् ।

यहाँको बारेमा धेरै कुराहरू सुनेको भए पनि यहाँ आएपछि मात्रै सबै प्रत्यक्ष देख्न पाएकाले सुनेको भन्दा देख्दा धेरै नै फरक पाएको उनी बताउँछन् । कालीगण्डकी नदिको स्नान गरी मन्दिरको दर्शन गरी देशकै नमुना तीन मुखे पुलको अवलोकन गर्न पाउँदा मनमा आनन्द आएको उनको भनाइ छ ।  यस क्षेत्रको दर्शन गरी कालीगण्डकी कोरिडोर हुँदै एसियाकै ठुलो शिलाशालीग्राम रहेको सेतीवेनीमा दर्शन जाने गरेका छन् ।

यस क्षेत्रमा नयाँ वर्ष, असारे ठुला एकादशी, हरीबोधनी एकादशी, मकरसंक्रान्तीमा विशेष मेला लाग्ने गर्दछ भने दैनिक रूपमा कालीनदि स्नान गर्ने र मन्दिर दर्शन गर्न देशका विभिन्न जिल्लाहरूबाट आउने गरेको स्थानीय पुजारी चुरामणी तिमिल्सेनाले बताएका छन् ।

यस क्षेत्रको धार्मिक गरिमालाई थप टेवा पुग्ने उद्देश्यले रिडीमा केही दिन पहिले खुल्ला दोहोरो शङ्ख फुक्ने र भजन प्रतियोगिता सम्पन्न भएको छ ।