खोज

काठमान्डौ, १५ मंसिर ।

नेपाली कांग्रेसको केन्द्रीय कार्यसमिति बैठक सोमबार बस्ने भएको छ । महाधिवेशनको विषयमा देखिएको विवादका कारण बैठक पछिल्ला दिनहरूमा पटक–पटक सारिँदै आएको छ । आइतबार दिउँसो बस्ने भनिएको बैठक पनि स्थगित भएर सोमबारका लागि सारिएको हो ।

कांग्रेसका मुख्यसचिव कृष्णप्रसाद पौडेलका अनुसार सोमबार दिउँसो २ बजे पार्टी केन्द्रीय कार्यालय सानेपामा बैठक बस्ने तय भएको छ ।

यसैबीच, नेपाली कांग्रेसको संस्थापन समूहले विशेष महाधिवेशनको मागसम्बन्धी प्रस्ताव फिर्ता भए पुस महिनामै नियमित महाधिवेशन गर्न तैयार हुने जनाएको छ ।

आइतबार बिहान सभापति शेरबहादुर देउवालासँग भेट गर्न पुगेका संस्थापन पक्षका केन्द्रीय सदस्यहरूले असोज २९ गते कार्यवाहक सभापति पूर्णबहादुर खड्कालाई २ हजार ४८८ महाधिवेशन प्रतिनिधिहरूको हस्ताक्षरसहित बुझाइएको विशेष महाधिवेशनको प्रस्ताव फिर्ता गरिए मात्र आफूहरू पुसमा हुने भनिएको नियमित महाधिवेशनमा सहमत हुने बताएका हुन् ।

भेटका क्रममा देउवाले पुसमै १५ औँ महाधिवेशन गर्नेगरी कार्यतालिका ल्याइने आश्वासन दिएका थिए । त्यसका जवाफमा केन्द्रीय सदस्यहरूले आफूहरू निर्वाचनअघि नै नियमित महाधिवेशन गर्न तयार भए पनि विशेष महाधिवेशनको माग–सहित बुझाइएको हस्ताक्षर फिर्ता गर्नुपर्ने सर्त दोहोर्याएका थिए ।