खोज

सल्यान, १५ मङ्सिर ।

सल्यानका चार स्थानीय तहमा जलवायु परिवर्तनको दीर्घकालीन प्रभाव न्यूनीकरणका क्रियाकलाप सञ्चालन हुने भएका छन् ।

जलवायु परिवर्तन स्थानीय अनुकूलन (ल्याक) परियोजना मार्फत जिल्लाका एक नगरपालिका र तीन गाउँपालिकामा जलवायु परिवर्तनको दीर्घकालीन प्रभाव न्यूनीकरण, जोखिम व्यवस्थापन र स्थानीय स्तरका अनुकूलन कार्यक्रमहरू सञ्चालन हुने भएका हुन् ।

यसका लागि शारदा नगरपालिका, कपुरकोट गाउँपालिका, कालीमाटी गाउँपालिका र त्रिवेणी गाउँपालिकाले हालै सुर्खेतमा सम्पन्न कार्यक्रममा सङ्घीय मामिला तथा सामान्य प्रशासन मन्त्रालयसँग सम्झौता गरिसकेका छन् ।

कार्यक्रम युरोपियन युनियन र फिनल्यान्ड सरकारको आर्थिक सहयोगमा, को–वाटर तथा जलवायु परिवर्तन अनुकूलन आयोजना सुर्खेतको प्राविधिक नेतृत्वमा कार्यान्वयन हुने जानकारी दिँदै शारदा नगरपालिकाका प्रमुख प्रकाश भण्डारीले आफ्नो नगरपालिकामा वार्षिक करिब पाँच करोडको हाराहारीमा बजेट रहने बताए ।

ल्याक मार्फत विशेष गरी प्राकृतिक स्रोत व्यवस्थापन, पानी र वन संरक्षण, दिगो कृषि प्रणाली, विपद् जोखिम न्यूनीकरण तथा जलवायु संवेदनशील समुदायको क्षमता अभिवृद्धिमा जोड दिने पालिकाहरूले जनाएका छन् ।

जलवायु परिवर्तनका प्रभावले समुदायमा विभिन्न समस्या देखा परिरहेको जनाउँदै कालीमाटी गाउँपालिकाका अध्यक्ष दान बहादुर केसीले यस कार्यक्रमबाट अनुकूलनका गतिविधिहरू प्रभावकारी रूपमा चलाइने र आफ्नो पालिकाका बासिन्दाले प्रत्यक्ष लाभ पाउने विश्वास व्यक्त गरे ।

“पाँच वर्षसम्म यो परियोजनाले काम गर्नेछ । हाम्रो पालिकामा वार्षिक दुई करोड बढीको काम गर्ने, कामको प्रगतिको आधारमा थप बजेटको पनि व्यवस्थापन हुने भन्ने कुरा छ”, उनले भने, “आयआर्जनका कामबाट जलवायुको असरमा परेका स्थानीयहरूको आर्थिक अवस्था उकास्ने किसिमका कार्यक्रम सञ्चालन गर्ने लक्ष्य छ ।”

यस बहु वर्षीय अनुकूलन परियोजनाले स्थानीय तहलाई सक्षम बनाउँदै कृषि, वन संरक्षण, पूर्वाधार र सामाजिक विकासका क्षेत्रमा ठोस परिणाम ल्याउने विश्वास गरिएको छ । सङ्घ, प्रदेश र स्थानीय तहको सहकार्य मोडेलमा अघि बढ्ने यस परियोजना २०२९ सम्म निरन्तर सञ्चालनमा रहनेछ ।

ल्याकको उद्देश्य जलवायु परिवर्तनका प्रभावको सामना गर्न स्थानीय तहलाई सक्षम बनाउने रहेको छ ।

हालै सुर्खेतमा सम्पन्न सम्झौतामा हस्ताक्षर तथा परिचयात्मक अभिमुखीकरण कार्यक्रममा परियोजनाका लक्ष्य, कार्यविधि तथा आगामी कार्य योजना प्रस्तुत गरिएको थियो ।

जलवायु परिवर्तनका असर तीव्र रूपमा देखा पर्दै गएको वर्तमान अवस्थामा अन्तर्राष्ट्रिय सहयोगमा सञ्चालित यस्तो कार्यक्रम सल्यानका स्थानीय तहका लागि समयानुकूल र आवश्यक रहेको जनप्रतिनिधिहरूको भनाइ छ ।

सङ्घीय मामिला तथा सामान्य प्रशासन मन्त्रालयमार्फत कर्णाली र सुदूरपश्चिम प्रदेशका स्थानीय तहमा जलवायु परिवर्तन स्थानीय अनुकूलन परियोजना सञ्चालनका लागि गत भदौमा प्रस्ताव आह्वान गरेको थियो ।

प्राप्त प्रस्तावहरूको “जलवायु परिवर्तन स्थानीय अनुकूलन (परियोजना सञ्चालन तथा व्यवस्थापन) कार्यविधि, २०८२” बमोजिम मूल्याङ्कन पश्चात् सल्यानका पनि चार स्थानीय तह छनौटमा परेका थिए ।