खोज

बुटवल, १३ मंसिर ।

विद्यालयस्तरको फुटबल खेल र खेलाडीलाई प्लेटफर्म दिने गरी सेभेन ए साइड फुटबल प्रतियोगिता सुरु भएको छ । टुगेदर वि क्यान मोटोसहित क्यानन सेकेण्डरी स्कुलको आयोजनामा दोस्रो क्यानन सेभेन ए साइड फुटबल प्रतियोगिता २०८२ आइतबारदेखि सुरु भएको हो ।

सिद्धेश्वर खेल मैदानमा भएको उद्घाटन खेलमा कान्ति मावि विजयी भएको छ । निक्कै प्रतिस्पर्धात्मक खेलमा कान्ति माबिले सेभेन स्टार बोर्डिङ स्कुललाई १–० गोल अन्तरले पराजित गरेको हो । कान्तिको जितमा रंजित कुवरले एकमात्र गोल गरे ।

यसैगरी दोस्रो खेलमा गतवर्षको विजेता स्कलर्स होम बोर्डिङ स्कुलले नविन औद्योगिक माविलाई पराजित गरेको छ । निर्धारित समय गोलरहित बराबरी भएपनि खेल ट्राइबेकरमा धकेलिएको थियो । ट्राइबेकरमा स्लकर्सका गोलकिपर नविन मस्र्यागीले उत्कृष्ट बचाउ गर्दै खेलमा जित निकाले । उनी खेलमा म्यान अफ दी म्याचबाट पुरस्कृत भएको संयोजक पवन बश्यालले बताए ।

एक समारोहका बिच रुपन्देही जिल्ला फुटबल संघका अध्यक्ष लोक पुन, विद्यालय ब्यवस्थापन समितिका अध्यक्ष थानेश्वर पौडेल, विद्यालयका प्रधानाध्यापक शंकर भण्डारीले रेफ्रीलाई बल हस्तान्तरण गरी खेल शुभारम्भ गरे । प्रतियोगिताको उपाधि विजेताले नगद ५५ हजार ५५५, उपविजेताले ३३ हजार ३३३ रुपैया, कप, मेडल प्रमाणपत्रबाट पुरस्कृत गरिने छ ।

यसैगरी विधागत रुपमा उत्कृष्ट खेलाडी ३ हजार रुपैयाँ, उत्कृष्ट गोलरक्षक र सर्वाधिक स्कोररलाई २ हजार ५ सय रुपैयाँ, कप, मेडल, प्रमाणपत्रबाट पुरस्कृत गरिने छ । प्रतियोगिता सम्पन्न गर्न ५ लाख ६० हजार खर्च हुने विद्यालयको अनुमान छ । प्रतियोगितामा ३० वटा विद्यालयहरु भाग लिदैछन ।