खोज

गुल्मी, १४ मङ्सिर ।

गुल्मीको रेसुङ्गा नगरपालिकामा निर्माणाधीन अत्याधुनिक सभाहल निर्माणको कामले गति लिन थालेको छ । गत तीन वर्ष अघि निर्माण सुरु गरिएको उक्त सभाहल बजेट अभावका कारण निर्माण कार्यमा ढिलाइ भएको थियो ।

सङ्घीय सरकार अन्तर्गत सघन सहरी तथा भवन निर्माण आयोजना कार्यालयबाट भ्याटसहित १४ करोड १७ लाख १३ हजार ९३७ रुपैयाँ लागतमा रेसुङ्गा सभाहलको निर्माण सुरु भएको हो ।

सदरमुकाम तम्घास नजिकै रेसुङ्गा नगरपालिका–४ स्थित अर्खलेमा निर्माण भइरहेको सभाहल जिल्लामा सबैभन्दा ठुलो र अत्याधुनिक प्रकारको रहेको छ ।

निर्माण कार्य सुरु भएको तीन वर्षमा निर्माणाधीन सभाहलको हालसम्म ७५ प्रतिशत भौतिक र ६५ प्रतिशत वित्तीय प्रगति भएको सघन सहरी तथा भवन निर्माण आयोजनाका इन्जिनियर घनश्याम यादवले जानकारी दिएका छन् ।

२०७९ कार्तिक २७ गते सम्झौता गरी डिएनडी सत्तेश्वर ¥याकेट जेभीले सभाहल निर्माणको जिम्मा लिएको थियो । तोकिएको समयावधिमा काम सम्पन्न हुन नसकेपछि २०८२ चैत मसान्तसम्म म्याद थप गरिएको इन्जिनियर यादवले बताए ।

बजेट अभावसँगै अन्य विभिन्न समस्याका कारण सभाहलको निर्माण कार्यमा ढिलाइ हुन जाँदा म्याद थप गर्नुपरेको बताइएको छ । यस आर्थिक वर्षमा सभाहलको भवन हस्तान्तरण गर्ने गरी निर्माणको काम भइरहेको इन्जिनियर यादवले बताए ।

पाँच रोपनी क्षेत्रफलमा निर्माण भइरहेको उक्त सभाहल दुई तले, अग्नि नियन्त्रण र भूकम्प प्रतिरोधी, अत्याधुनिक कोठा, गार्डेन र पार्किङ सुविधा, दुई वटा हल सहितको आधुनिक किसिमबाट निर्माण हुन लागेको हो ।

सभाहलमा एकातिर १०८ जना अट्ने क्षमताको बहुउद्देश्यीय र अर्कोतिर ४३२ जनाको क्षमता सहितको मुख्य हल गरी कुल ५४० जना मानिसहरू अट्न सक्नेछन् । सभाहलको अहिले सजावटसँगै फर्निचर व्यवस्थापन, गार्डेन र कम्पाउन्ड निर्माणको काम भइरहेको निर्माण व्यवसायी धनिश्वर गौतमले जानकारी दिएका छन् ।

जिल्लामा अत्याधुनिक सभाहलको अभावमा ठुला प्रकारका विभिन्न सभा तथा कार्यक्रमहरू सञ्चालन हुन सकेका थिएनन् । सभाहल निर्माण भएसँगै जिल्लाको आर्थिक तथा पर्यटन क्षेत्रको विकासमा समेत ठुलो सहयोग पुग्ने रेसुङ्गा नगरपालिका–४ का वडाध्यक्ष लिलाधर आचार्यले बताए ।