खोज

काठमाडौँ ।

पछिल्लो एक सातादेखि निरन्तर उकालो लागिरहेको सेयर बजारमा आज ‘करेक्सन’ देखिएको छ । आइतबार नेपाल स्टक एक्सचेन्ज (नेप्से) परिसूचक दोहोरो अंकले ओरालो लागेको हो ।

आज नेप्से परिसूचक २६.५१ अंकले घटेर २६४९.५२ विन्दुमा बन्द भएको छ । यो अघिल्लो कारोबारको तुलनामा ०.९९ प्रतिशतको गिरावट हो ।

बजार घटे पनि कारोबार रकम उत्साहजनक देखिएको छ । आज कुल ७ अर्ब ८ करोड ५४ लाख ४९ हजार रुपैयाँ बराबरको सेयर खरिद–बिक्री भएको छ । ३४२ वटा स्क्रिप ८४,१५६ पटकको कारोबारमा १ करोड ५७ लाख ३६ हजार ३७२ कित्ता सेयर खरिदबिक्री भएका छन् ।

आजको बजारमा २५७ कम्पनीको कारोबार भएकोमा २११ कम्पनीको सेयर मूल्य घटेको छ, ४५ कम्पनीको मूल्य बढेको छ भने एक कम्पनीको मूल्य स्थिर रहेको छ ।

बजार घटे पनि केही कम्पनीका लगानीकर्ताले राम्रो नाफा कमाएका छन् । आज ५ वटा कम्पनीको सेयर मूल्यमा सकारात्मक सर्किट लागेको छ । ती कम्पनीहरू हुन्: सागर डिस्टिलरी, निफ्राको ऋणपत्र, स्वस्तिक लघुवित्त, झापा इनर्जी र आत्मनिर्भर लघुवित्त ।

आज एनएमबि बैंकको डिबेञ्चरमा सर्वाधिक ८.९९ प्रतिशत गिरावट देखिएको छ ।

बजारमा आज म्यानुफ्याक्चरिङ र म्युचुअल फण्ड बाहेक सबै सूचक घटेका छन् । बैंकिङ लगायत सातवटा सूचकमा एक प्रतिशतभन्दा बढीको गिरावट देखिएको छ । सबैभन्दा धेरै गिरावट लगानी समूहमा १.४८ प्रतिशतले भएको छ ।

कारोबार रकमका आधारमा आज हिमालयन रिइन्स्योरेन्स शीर्ष स्थानमा रहेको छ । उक्त कम्पनीको २३ करोड ५ लाख रुपैयाँ बराबरको कारोबार भएको छ । त्यसैगरी जोशी हाइड्रोपावर, ग्रीन भेञ्चर र एनआरएन इन्फ्रास्ट्रक्चरमा पनि लगानीकर्ताको उच्च आकर्षण देखिएको छ ।