खोज

काठमाडौं ।

नेपाल राष्ट्र बैंकको मुद्रा व्यवस्थापन विभागले बिहीबारदेखि चुच्चे नक्सा भएको एक सय रुपैयाँको नयाँ नोट प्रचलनमा ल्याएको छ । राष्ट्र बैंकले चुच्चे नक्सासहितको नेपाली नोट बजारमा ल्याएपछि भारतीय मिडियाहरुमा विवादित नक्सा छापिएको समाचार प्रकाशित भएको छ ।

अधिकांश भारतीय मिडियाहरुले भारतका तीन इलाकालाई नेपालको बताएको उल्लेख गर्दै समाचार सम्प्रेषण गरेका छन् । भारतीय मिडिया आजतकले भारतको विरोधको बाबजुद नयाँ नोटमा चुच्चे नक्सा राखेको उल्लेख गरेको छ । हिन्दुस्तान टाइम्सले १०० रुपैयाँको नयाँ नोटमा नेपालको नक्सामा भारतीय भूमि कालापानी, लिपुलेक, लिम्पियाधुरा समावेश गरेको लेखेको छ ।

आजतकले नेपालको नोटमा छापिएको विवादित क्षेत्र कालापानी, लिपुलेक र लिम्पियाधुरा समावेश हुँदा भारतको आपत्ति रहेको जनाएको छ ।

नवभारत टाइम्सले भारतका तीन क्षेत्रलाई नेपालले आफ्नो भूमि दाबी गरेको उल्लेख गरेको छ । दैनिक भास्करले भारत सरकारलाई उद्धृत गर्दै यस्तो दबाबले साँचो कुरो परिवर्तन नहुने लेखेको छ ।

न्युज एट्टिनले नेपालले पुन: भारतलाई उक्साउने हर्कत गरेको लेखेको छ । भारतीय सञ्चारमाध्यम जागरणले नेपाली नोटमा भारतीय क्षेत्रलाई समावेश गरेको उल्लेख गरेको छ । पन्जाबबाट प्रकाशित पन्जाब केशरीले नेपालको नयाँ नोटले विवाद उत्पन्न गरेको लेखेको छ ।

एबीपी न्युज, एण्डडी टिभी, जीन्युज लगायतका ठूला मिडियाले नेपाली भूमिलाई भारत भएको दाबी गर्दै समाचार सम्प्रेषण गरेका छन् ।

नेपाली नोटको अग्र भागमा बायाँतर्फ सगरमाथाको चित्र रहेको छ भने दायाँतर्फ लालीगुराँसको छाप । यस्तै, मध्यभागमा नेपालको चुच्चे नक्सा रहेको छ ।

नोटको मध्यभागमा अशोक स्तम्भको चित्रका साथै अङ्ग्रेजीमा लुम्बिनी द बर्थ प्लेस अफ लर्ड बुद्ध लेखिएको छ । साथै, अशोक स्तम्भसँगै दृष्टिविहीनलाई नोट पहिचानको लागि छामेर थाहा पाउने एउटा कालो कलरको थोप्ला रहेको र बायाँतर्फ अण्डाकारभित्र सिल्भर मेटालिकमा मायादेवी चित्र अंकित रहेको राष्ट्र बैंकले जनाएको छ ।