खोज

काठमान्डौ, ११ मंसिर ।

संयुक्त चुनाव चिह्नमा निर्वाचन लड्ने दलहरूको संख्या बढ्दै गएको छ ।

निर्वाचन आयोगका नियम अनुसार, एकभन्दा बढी दलले एउटै चुनाव चिह्नमा निर्वाचन लड्न चाहँदा आयोगको स्वीकृति लिनुपर्छ । कुन दलको चुनाव चिह्नमा संयुक्त निर्वाचन लडिने हो भन्नेबारे सम्बन्धित दलले आयोगमा निवेदन दिनुपर्छ र आयोगले निर्णय गर्नेछ ।

यसअन्तर्गत उज्यालो नेपाल पार्टी र हाम्रो पार्टी नेपालले बिजुलीको चिम चुनाव चिह्नमा संयुक्त रूपमा निर्वाचन लड्ने निवेदन दिएका छन् । त्यस्तै, राष्ट्रिय मुक्ति पार्टी नेपाल, जनता समाजवादी पार्टी र नागरिक उन्मुक्ति पार्टी नेपालले जाँतो चुनाव चिह्नमा निर्वाचन लड्ने तयारी गरेका छन् ।

नेपाल संघीय समाजवादी पार्टी, बहुजन एकता पार्टी नेपाल र नेपाल जनजागृति पार्टीले पनि एउटै चुनाव चिह्नमा निर्वाचन लड्ने निवेदन आयोगमा पेश गरेका छन् ।

राजनीतिक दल सम्बन्धी ऐनको दफा ४९ अनुसार, दुई वा दुईभन्दा बढी दलले कुनै दलले प्राप्त गरेको चुनाव चिह्न वा अन्य कुनै निर्वाचन चिह्नमा संयुक्त रूपमा निर्वाचनमा भाग लिन सक्ने व्यवस्था छ । संयुक्त निर्वाचनमा सहभागी दलको तर्फबाट उम्मेदवारी दिँदा उम्मेदवार कुन दलसँग सम्बन्धित हो भन्ने जानकारी खुलाउनुपर्नेछ ।

दुई वा बढी दल संयुक्त निर्वाचनमा सहभागी भएमा, ती दलमध्ये सबैभन्दा बढी सिट प्राप्त गर्ने दलको नाममा एक मात्र संसदीय दल गठन हुनेछ । अन्य दलका निर्वाचित सदस्यहरू पनि सोही संसदीय दलको सदस्य मानिनेछन् । नयाँ चुनाव चिन्हमार्फत संयुक्त रूपमा निर्वाचनमा सहभागी दलका निर्वाचित सदस्यहरूले दफा २४ अनुसार नयाँ संसदीय दल गठन गर्नेछन् र सो दलको नाम सम्बन्धित संसदीय दलले निर्धारण गर्नेछ ।

४ मंसिर २०७९ मा भएको प्रतिनिधिसभा सदस्यको निर्वाचनमा ८४ दलले चुनाव लडेका थिए । त्यतिबेला पनि केही दलहरूले संयुक्त चुनाव चिह्नमा भाग लिएका थिए । यसपटक निर्वाचनमा भाग लिन चाहने दलको संख्या उल्लेख्य वृद्धि भएको छ । बुधबारसम्म १०६ दल निर्वाचन प्रयोजनका लागि दर्ता भइसकेका छन् । दल दर्ताको समय मंसिर १४ गतेसम्म थपिएकाले अझ केही दल दर्ता हुने अपेक्षा गरिएको छ ।