खोज

काठमाडौँ, ०९ मङ्सिर ।

प्रधानमन्त्री सुशीला कार्कीले ज्ञापन पत्र बुझ्ने समय नदिएको भन्दै मंगलबार पनि सिंहदरबार गेटअगाडि मिरज ढुंगाना समूहले प्रदर्शन गरे । आइतबार बैठक बसेर सोमबारदेखि निरन्तर आन्दोलनमा जाने निर्णय गरेको यो समूहले मंगलबार टाउकोमा कालोपट्टी बाँधेर प्रदर्शन गरेको हो ।

सिंहदरबार प्रवेश गर्न खोज्दा मिरज समूह र प्रहरीले केहीबेर धकेलाधकेल गरेका थिए । सिंहदरबार गेट पुगेर गिरफ्तारी दिने योजना बनाएको समूहलाई प्रहरीले रोकेको छ ।

सोमबार पनि सिंहदरबार गेटअगाडि पुगेर प्रधानमन्त्री भेट्न नपाएपछि समूहले असन्तुष्टि जनाएको थियो । प्रधानमन्त्रीलाई बुझाउने भनिएको मागपत्र गेटमै टाँसेर हिँडिएको थियो ।

मिरज नेतृत्वको गरिखान देउ अभियानका अगुवा हरिष भट्टकाअनुसार मंगलबार भने समूहको उद्देश्य प्रधानमन्त्रीलाई भेट्नु भन्दा गेटअगाडि प्रदर्शन गर्नु थियो ।

‘आज हामी सिंहदरबार पुगेर गिरफ्तारी नै दिने पूर्वयोजना अनुसार प्रदर्शनका लागि गएका हौँ । अब यो आन्दोलन हाम्रो माग पूरा नभएसम्म निरन्तर जारी रहन्छ,’ भट्टले भने ।

सोमबार मिरज समूहसहित अन्य जेनजी अगुवाले विभिन्न विषय समेटेर ८ बुँदे संयुक्त मागपत्र सिंहदरबारको गेटमा टाँसेका थिए ।

मागपत्रमा तत्कालीन प्रधानमन्त्री केपी शर्मा ओली, गृहमन्त्री रमेश लेखकसहित भदौ २३–२४ को घटनामा संलग्न सबैलाई पक्राउ गर्न, वर्तमान संविधान संशोधनको लागि सर्वपक्षीय सरकार बनाउने र घोषित निर्वाचन रोक्न माग गरिएको थियो ।

त्यसैगरी, मागपत्रमा सबै राजनीतिक दलका नेता तथा पूर्वसांसद मन्त्रीहरूको चलअचल सम्पत्ति रोक्का गर्न, शक्तिशाली भ्रष्टाचार निर्मूल आयोग गठन गर्न, सरकारी सेवामा दलीय कर्मचारी संगठन सदाका लागि प्रतिबन्ध लगाउन, जेनजी निगरानी आयोग बनाउन र शहीद घाइते परिवारलाई तत्काल रोजगारी दिने माग समेटिएको छ ।

आफ्ना माग पूरा नभएसम्म आन्दोलन नछोड्ने बताएको यो समूह अहिले सिंहदरबार आसपास प्रहरीसँग धकेलाधकेल गरिरहेको छ । ‘हामीलाई अनामनगरको बार्दलीसम्म प्रहरीले पन्छाएको छ । तर, हाम्रा साथीहरू फेरि सिंहदरबारतिरै जान खोज्दै छन् । आज जसरी पनि त्यहाँ प्रदर्शन गरिन्छ,’ भट्टले बताए ।

प्रधानमन्त्री सुशीला कार्कीका प्रमुख स्वकीय सचिव आदर्शकुमार श्रेष्ठले आफ्ना परिवारका सदस्य र नातेदारहरूलाई सचिवालयमा नियुक्ति दिलाएको खुलेपछि मिरजसहितका जेनजी समूह आक्रोशित बनेका छन् ।