खोज

काठमाडौँ, ०९ मङ्सिर ।

बालाजुमा गत शनिबार मृत भेटिएकी माया भनिने आयुषा मगरको १० दिन पहिला नै हत्या गरेर फालिएको खुलेको छ । जिल्ला प्रहरी परिसर काठमाडौंको टोलीले हत्या आरोपमा सूर्य थापा मगरलाई पक्राउ गरी अनुसन्धान गर्दैछ ।

सूर्यले प्रहरीलाई बताएका छन् कि उनले ती महिलाको हत्या २६ कात्तिकको राति नै गरेका थिए र त्यसैबेलै शवको व्यवस्थापन पनि गरेका थिए । तर १० दिनसम्म सडक किनारामा शव रहँदा समेत कोही कसैले थाहा पाएका थिएनन् ।

टोखा नगरपालिका–९ स्थित नयाँ बसपार्क नजिकको सडक किनारमा सूर्यले आयुषाको शव फालेका थिए । २६ कात्तिकको राति फालेको शव स्थानीयले ६ मंसिरमा मात्रै देखे । बन्चरेडाँडामा फोहर फाल्न अवरोध भएपछि सडकमा थुप्रिएको फोहरलाई स्थानीयले सामान्य फोहर सम्झिएका थिए ।

शनिबार सरसफाइ कार्यक्रमको क्रममा स्थानीयले फोहरको थुप्रो खोल्दा शव भेटेपछि मात्र प्रहरीलाई खबर गरेका थिए । घटनाको १० दिनपछि प्रहरीले शव भेट्टाएर अनुसन्धान सुरु गरेको थियो ।

जिल्ला प्रहरी परिसर काठमाडौंका एसपी तथा प्रवक्ता पवनकुमार भट्टराईका अनुसार अनुसन्धान क्रममा शव २६ कात्तिकमै हत्या गरेर फालिएको पुष्टि भएको छ ।

सुरुमा प्रहरीले हत्याकाण्डमा तेस्रो लिंगी व्यक्तिको संलग्नता देखाएको थियो, तर मृतक युवती आयुषा मगर भएकी पुष्टि भएको छ । हत्याको कारण ५ सय रुपैयाँसँग सम्बन्धित रहेको प्रहरीले जनाएको छ । सूर्यले समेत यसलाई स्वीकार गरेका छन् ।

शनिबार बिहान ८ बजेतिर तन्नाले बेरेको अवस्थामा शव भेटिएको थियो । टोखाको मिलनटोल नयाँ बसपार्कस्थित एक होटलको स्टाफ रहेको तन्नाले कालो प्लाष्टिकमा प्याक गरेर शव फालेको अनुसन्धानमा खुलेको छ ।

प्रहरीले उक्त होटलका सञ्चालक र म्यानेजरलाई सोधपुछ गर्दा उनीहरूले केही थाहा नभएको बताएका थिए । त्यसपछि २४ वर्षीय सूर्य थापा मगरलाई नियन्त्रणमा लिएर अनुसन्धान सुरु गरिएको थियो ।

प्रारम्भिक सोधपुछमा सूर्यले हत्याको घटना स्वीकार गरेका थिए । अनुसन्धानका क्रममा उनले हत्या गर्नुको मुख्य कारण ५ सय रुपैयाँ रहेको बताए ।

अनुसन्धान अनुसार १५ दिनअघि आयुषा र अर्को डोल्मा नाम गरेका दुई जना राति १२ बजेतिर होटलमा पुगेका थिए । त्यतिबेला आयुषाले सूर्यसँग ५ सय रुपैयाँ मागेकी थिइन् ।

सूर्यले ब्राउन सुगर किन्न भनेर ५ सय रुपैयाँ सापटी मागेको, तर आयुषाले नदिएकाले उनले जुत्ताको तुनाले घाँटी थिचेर हत्या गरेको प्रहरीले पुष्टि गरेको छ । हत्या गरिएको युवती आयुषा विवाहित रहेको पाइएको छ ।

उनका आमा कल्पनाले शेर्पालीले छोरीको सनाखत गरेका छन् ।