खोज

काठमान्डौ, ८ मंसिर ।

प्रधानमन्त्री सुशीला कार्कीको सचिवालयले प्रमुख स्वकीय सचिव आदर्श कुमार श्रेष्ठले परिवारका सदस्य तथा नातेदारलाई नियुक्त गरेको भन्दै सार्वजनिक रूपमा उठेका प्रश्नहरुबारे प्रतिक्रिया दिएको छ ।

सचिवालयका अनुसार प्रमुख स्वकीय सचिवलाई अनावश्यक रूपमा लाञ्छित गर्दै तथ्यहीन आरोप जोडिएको छ । कतै केवल थर मिलेको र कतै जातीय पृष्ठभूमि समान भएको आधारमा नातेदार ठहर्याई गरिएको प्रचार भ्रामक रहेको सचिवालयले स्पष्ट पारेको छ ।

चौतर्फी आलोचनापछिआज बिहान प्रधानमन्त्री कार्कीका प्रेस संयोजक रामबहादुर रावलद्वारा जारी विज्ञप्तिमा भनिएको छ, “प्रधानमन्त्रीको निवासमा रही नजिकबाट सहयोग गर्नु पर्ने, चौबीसै घण्टा साथमा रहेर खटिनुपर्ने कार्यप्रकृतिका कारण सुरक्षासम्बन्धी विश्वासिलो, भरपर्दो र दिन–रात काम गर्न सक्षम व्यक्तिलाई कानुनी प्रक्रिया पूरा गरी नियुक्त गरिएको हो । यस विषयमा अनावश्यक व्याख्या–व्याख्यान नगर्न अनुरोध छ ।”

“यसबाहेक अन्य नियुक्तिहरुमा प्रमुख स्वकीय सचिवलाई लाञ्छना लगाई अनावश्यक रुपमा जोडिएको र कतै थर र कतै जातीय पृष्ठभूमि मिलेकै आधारमा जबरजस्ती नातेदार भनी प्रचार गरिएको देखिएकोले त्यसो नगरिदिन हुन पनि अनुरोध छ,’ विज्ञप्तिमा लेखिएको छ ।

जेनजी आन्दोलनको बलमा प्रधानमन्त्री बनेकी सुशीला कार्कीले मितव्ययिता, पारदर्शिता र जवाफदेहिताका सिद्धान्तप्रति संवेदनशील रहँदै सोहीअनुसार जिम्मेवारी निर्वाह गर्दै आएको सचिवालयले जनाएको छ ।

राज्यकोषमा न्यूनतम भार पर्न दिने उद्देश्यले प्रधानमन्त्रीको सचिवालय अत्यन्तै सीमित जनशक्तिबाट सञ्चालन भइरहेको पनि विज्ञप्तिमा प्रष्ट्याइएको छ ।

कार्यालयका अनुसार कार्यविधिअनुसार ७ जना सल्लाहकार राख्न सकिने भए पनि हाल २ जना मात्र नियुक्त छन् । त्यस्तै, १९ दरबन्दीमध्ये ४ जना मात्र विज्ञ कर्मचारी नियुक्त गरिएको छ, जसमध्ये एक जना अवैतनिक छन् । स्वकीय सचिवालयमा ४१ जनाको दरबन्दी भए पनि हाल १४ जना मात्र कार्यरत छन् ।

विज्ञप्तिमा भनिएको छ, “कुल ६७ जनाको दरबन्दी रहे पनि विगतका सरकारहरूले प्रायः सबै पदमा कर्मचारी भरेका थिए । तर वर्तमान प्रधानमन्त्रीज्यूले अत्यावश्यक र नगरी नहुने कार्यका लागि मात्र २० जनाको सीमित सचिवालय गठन गर्नुभएको छ ।”