खोज

कतार, ७ मंसिर 

दोहा, कतार – एनआरएनए आइसिसीका पूर्व अध्यक्ष कुल आचार्यले जन्मभूमिप्रति अब वास्तविक योगदान दिनुपर्ने समय आएको बताएका छन्। गैरआवासीय नेपाली संघ (एनआरएनए) एनसिसी कतारले आयोजना गरेको “भेटघाट” कार्यक्रममा सम्बोधन गर्दै उनले विदेशमा बसेका नेपालीहरू बोल्ने मात्र होइन, राष्ट्र निर्माण र समृद्धिको यात्रामा सक्रियतापूर्वक सहभागी हुनुपर्नेमा जोड दिए।

आचार्यले भने, “हामीलाई जन्माउने मातृभूमि अहिले अप्ठ्यारो अवस्थाबाट गुज्रिइरहेकी छ। यस्ता चुनौतीपूर्ण परिस्थितिमा विश्वभर रहेका नेपालीहरूले देश निर्माणका लागि जुट्नैपर्छ।” देशले विदेशमा रहेका नेपालीहरूप्रति आज पनि ठूलो अपेक्षा राखेको भन्दै उनले थपे, “विदेशमा बसेको भन्दै जिम्मेवारी कम हुँदैन। अहिले केही गर्ने उत्तम समय यही हो।”

कतारमा रहेका दुईवटा एनसिसी इकाइबीच चलिरहेको विवाद सर्वोच्च अदालतको परमादेशअनुसार चाँडै समाधान हुने भरोसा आचार्यले व्यक्त गरे। एकता कायम भएपछि नेपालले खोजिरहेको समृद्धि यात्रामा यसले थप ऊर्जा दिने उनको विश्वास थियो।

Oplus_131072

नाकाबन्दी, कोभिड महामारी, बाढी–पहिरो, भूकम्प तथा अन्य प्राकृतिक विपत्का कठिन क्षणमा एनआरएनए एनसिसी कतार र कतारमा रहेका नेपाली श्रमिकहरूले गरेको सहयोगप्रति उनले उच्च प्रशंसा व्यक्त गरे।

कार्यक्रम एनआरएनए एनसिसी कतारका अध्यक्ष कृष्ण पन्थीको सभापतित्वमा तथा पूर्व अध्यक्ष आचार्यकै प्रमुख आतिथ्यतामा सम्पन्न भएको थियो। कार्यक्रमकै दौरान आचार्यलाई खादा ओढाएर सम्मानपत्र प्रदान गरी सम्मान गरिएको थियो।
कार्यक्रम सामाजिक सुरक्षा कोष, लगानीका अवसर तथा एनआरएनएका समसामयिक विषयमा केन्द्रित रहेको थियो।

भेटघाट कार्यक्रममा कतारका लागि नेपाल सरकारका पर्यटन दूत राजेन्द्र कुमार शर्मा, माछापुच्छ्रे बैंकका प्रमुख कार्यकारी अधिकृत सन्तोष कोइराला, राज रेग्मी, सागर नेपाल, रमेश भट्टलगायतका वक्ताहरूले शुभकामना मन्तव्य राखेका थिए।

समापन मन्तव्यमा सभापति पन्थीले कतारमा रहेका दुई एनसिसी इकाइबीच एकता कायम गर्न सकिएमा नेपाली श्रमिकहरूलाई ठोस फाइदा पुग्ने तथा समुदायमा आपसी सद्भाव र विश्वास अझै मजबुत हुने बताए।
कार्यक्रमको सहजीकरण एनसिसी कतारका महासचिव विवेक पुलामी मगरले गरेका थिए।