खोज

बुटवल, ७ मंसिर ।

बुटवलमा सम्पन्न जिल्लास्तरीय एन्फा यु–१४ अन्तर विद्यालय (छात्र÷छात्रा) फुटबल प्रतियोगिताको उपाधि नबिन औधोगिक माबि (छात्र) र कुवँरवर्ती बोर्डिङ स्कुल (छात्रा) ले चुमेको छ ।

अखिल नेपाल फुटबल संघ (एन्फा) को सहयोग, रुपन्देही जिल्ला फुटबल संघको आयोजनामा आईतबार भएको दुई फाईनलमा नबिन औधोगिक माबिले न्यू होराइजनलाई ७–० गोल तथा कुवँरवर्तीले सिद्धार्थ बोर्डिङ स्कुललाई ३–१ गोल अन्तरले पराजित गर्दै उपाधि चुमेको हो ।

देविनगरस्थित एन्फा टेक्निकल सेन्टरमा नबिनको जितमा निशाल चौधरी र प्रमेश चोलामी मगरले ह्याट्रिक गरे । एकतर्फी खेलमा चौथो मिनेटमा नबिन औद्योगिक माबिका निशान चौधरीले खाता खोले । उनले खेलको ११, ३१ औ मिनेटमा गोल गर्दै हयाट्रिक पुरा गरे । चौधरीले ४३ औ मिनेटमा थप गोल गरे । यसैगरि ३३, ५३ र ५४ औ मिनेट प्रमेश चोलामीमगरले गोल गरे ।

यता छात्रातर्फ भएको खेलमा कुवँरवर्तीको जितमा वर्षा सुनारले ह्याट्रिक गरे । उनले खेलको ११, ४० र ४२ औ मिनेटमा गोल गरिन् । सिद्धार्थकी लक्ष्मी थापाले पेनाल्टीमा सान्त्वना गोल गरिन ।

प्रतियोगितामा छात्रतर्फ सिद्घार्थका विशाल बिक हाईस्कोरर, नबिनका अजय भण्डारी बेष्ट गोलिकपर तथा नबिनकै प्रमिश चोलामीमगर भ्यालुवेयवल खेलाडीको घोषित हुदै पुरस्कृत भए । छात्रातर्फ कुवँरवर्तीकी वर्षा सुनार हाइस्कोरर तथा भ्यालुवेयवल खेलाडी तथा सिद्धार्थकी प्रकृति थापा बेष्ट गोलिकपरबाट पुरस्कृत भइन् ।

नबिनले उपाधिसंगै नगद ४० हजार रुपैया, शिल्ड, मेडल, प्रमाणपत्रबाट पुरस्कृत भयो । उपविजेता न्यू होराईजन भने नगद २० हजार रुपैया, शिल्ड, मेडल, प्रमाणपत्रबाट चित्त बुझायो । कुवँरवर्तीले उपाधिसंगै नगद २० हजार रुपैया, शिल्ड, मेडल, प्रमाणपत्रबाट पुरस्कृत भयो भने उपविजेता सिद्धार्थ भने नगद १० हजार रुपैया, शिल्ड, मेडल, प्रमाणपत्रमा चित्त बुझायो ।

एक समारोहका बिच अखिल नेपाल फुटबल संघ एन्फाका केन्द्रिय उपाध्यक्ष दीर्घ बहादुर केसी, जिल्ला अध्यक्ष लोक पुन, खेल संयोजक बुद्धि गुरुङले विजेता, उपविजेता टिम तथा उत्कृष्ट खेलाडीहरुलाई पुरस्कार वितरण गरे ।