खोज

 काठमाडौं,७ मंसिर ।

प्रगतिशील लोकतान्त्रिक पार्टी (प्रलोपा)ले भ्रष्टाचारविरुद्ध युवाशक्ति, अर्थात् ‘एन्टिकरप्शन युथ फोर्स’, गठन गर्ने भएको छ ।

सुशासनको सुनिश्चितता बिना कुनै पनि देशमा न्याय र विकास हासिल भएको छैन । त्यसकारण, हामी पार्टीभित्र सुशासनको उच्चतम अभ्यास गर्दै देशमा सुशासन कायम गर्न अग्रसर हुनेछौं ।

‘देशमा सुशासन हासिल गर्न मुलतः युवाको अगुवाईमा ‘भ्रष्टाचार विरुद्ध युवाशक्ति (एन्टिकरप्शन युथ फोर्स)’ गठन गरिने छ,’ आइतबार आयोजित पार्टी एकता समारोहमा प्रस्तुत पार्टीको राजनीतिक प्रतिबद्धता मस्यौदामा भनिएको छ ।

यो फोर्सले भ्रष्टाचारविरुद्ध सामाजिक बहिष्कार अभियान चलाउनेछ, प्रलोपालको मस्यौदामा उल्लेख छ ।

‘यो फोर्सले भ्रष्टाचारी, कालोबजारी, बलात्कारी, मानव बेचबिखान, गुण्डार्दी लगायतको क्रिमिनल प्रोफाइल तयार गर्ने, सामाजिक सञ्जालमा एक्सपोज अभियान सञ्चालन गर्ने, सामाजिक बहिष्कार अभियान चलाउने लगायत सुशासनका क्षेत्रमा प्रवर्द्धनात्मक, निरोधात्मक र आवश्यकताअनुसार जुझारु कार्यक्रमहरू सञ्चालन गर्नेछ,’ मस्यौदामा उल्लेख छ ।

आइतबार डा. बाबुराम भट्टराईले स्थापना गरेको र हाल दुर्गा सोबले नेतृत्व गरेको जसपा (नयाँ शक्ति), जनार्दन शर्माको पहलमा स्थापना गरिएको प्रगतिशील लोकतान्त्रिक पार्टी र रास्वपा परित्याग गरेका विघटित प्रतिनिधिसभा सदस्य सन्तोष परियार नेतृत्वको टोलीसँग एकता घोषणा गरिएको छ ।