खोज

चन्द्रौटा, ६ मंसिर ।

शनिबार रहतावल सामुदायिक वन उपभोक्ता समूहको निर्वाचन हुने तयारी भएको छ । तर उपभोक्ताको साधारण सदस्य समेत नरहेकोले पनि उम्मेदवारी दिएको पाइएको छ । कपिलवस्तुको शिवराज नगरपालिका वडा नम्ब ३ र ५ अन्तर्गत पर्ने वनमा हात्ती र बाघ चुनाव चिन्हसहित दुई वटा प्यानल चुनावी मैदानमा उत्रिएका छन् । उनीहरुबीच कडा प्रतिस्पर्धा हुने देखिएको छ ।

हात्ती चिन्हमा उत्तम चौधरी थारु रहेका छन्, भने बाघ चिन्हमा यज्ञ बहादुर बेल्वासे चुनावमा होमिएका छन् । आम उपभोक्ताहरुका अनुसार दुवै उम्मेदवार बलियो रहेको आंकलन गरिएको छ । तर आज निर्वाचन हुने मात्र केही समय बाँकी रहँदा पनि साधारण सदस्य समेत नरहेका व्यक्तिले उम्मेदवारी दिँदा स्थानीयहरुले प्रश्न उठाएका छन् । अध्यक्ष पदका उम्मेदवार बेल्वासेको प्यानलमा रहेको महिला सदस्यमा गिता थारु वनको सदस्य समेत नरहेको तथ्य फेला परेको छ ।

उम्मेदवारको अन्तिम नामावलीमा रहेको महिला सदस्यमा गिता थारुको घर धुरी संख्या नम्बर ३८६ उल्लेख गरिएको छ । तर सदस्यता नामावलीमा ३८६ नम्बरमा भने पुरुषतर्फ जगदेव थारु र महिलातर्फ थानेश्वरीको नाम उल्लेख छ । यसरी उम्मेदवारी दिँदा भने विगतमा गरिएका कार्य माथि प्रश्न चिन्ह खडा गर्दै यस्ता अवैधानिक गतिविधि नियन्त्रण गर्न उम्मेदवारी दिएको थारुले बताए ।

यता निर्वाचन समितिले प्राविधिक त्रुटि भएको बताएको छ । समितिका अनुसार यस विषयमा उजुरी परेको बताउँदै शनिबार बिहान छलफल गरी टुंगो लगाइने छ । संघीय वन नियमावली, २०७९, को दफा ४२ को उपदफा ८ ले सामुदायिक वन उपभोक्ता समूहको कार्यकारी समिति वा सामुदायिक वन उपभोक्ता समिति गठन गर्न सक्ने र उक्त समितिमा सामुदायिक वनको साधारण उपभोक्ताहरुमध्येबाट समितिको पदाधिकारीमा उम्मेदवार हुन सक्ने प्रावधान छ ।