कतार, ६ मङ्सिर ।
कतारमा बृहत् रक्तदान कार्यक्रम भव्य रूपमा सम्पन्न भएको छ । कतार देखि गृह जिल्ला सम्म सामाजिक क्षेत्रमा सक्रिय रहेको बागलुङ सेवा समाज कतार र समाजको संरक्षकत्वमा स्थापित बाग्लुङ सेवा समाज अक्षयकोषको संयुक्त आयोजना तथा नेपाली रक्तदाता संघ,कतारको समन्वयमा “बृहत् रक्तदान” कार्यक्रम सम्पन्न भएको हो ।
कतारको हमद हस्पिटलको ब्लड डोनेसन सेन्टरमा बिहान ८ बजे देखि सुचारु गरिएको
रक्तदान कार्यक्रममा अक्षयकोषका अध्यक्ष सन्तोष पौडेलले रक्तदान गर्दै कार्यक्रमको शुभारम्भ भएको थियो । “रक्तदान केवल परोपकार मात्र होइन, जीवन बचाउने महान् कार्य हो” भन्ने अभियानका साथ आयोजना गरिएको कार्यक्रममा १४० जनाले रक्तदान गर्नको लागी रजिस्ट्रेसन गरेका थिए । जस मध्य ९० जनाले रक्तदान गर्न सफल भएको समाजका अध्यक्ष निराजन गौतमले जानकारी दिए ।
अक्षयकोषका अध्यक्ष सन्तोष पौडेलले “नेपाली समुदायले विदेशमा पनि मानवता र सामाजिक उत्तरदायित्व बोकेर काम गर्छ भन्ने सन्देश यस अभियानले दिएको बताए । “मानवीय तथा परोपकारी” कार्यमा सहभागी भई रक्तदान गरेका सम्पूर्ण दाताहरूलाई मानवीय सेवा प्रतिको प्रतिबद्धताको प्रशंसा पत्र ग्रहण गर्दै अध्यक्ष निराजन गौतमले धन्यवाद व्यक्त गरे । गौतमले हामी नेपालीहरू जहाँ बसे पनि समाजप्रति उत्तरदायी रहन्छन् भन्ने उदाहरण सहित यो रक्तदान कार्यक्रमको अभियानले कतारमा रहेका विभिन्न बिरामीहरूको ज्यान बचाउन योगदान पुर्याउनेमा विश्वास व्यक्त गरे ।
‘रक्तदान, जीवनदान’ भन्ने नाराका साथ सञ्चालन गरिएको कार्यक्रम अन्तिम रक्तदान निराजन गौतमले गरेका थिए । कार्यक्रममा सयौँ नेपाली श्रमिक तथा विभिन्न संघ,संस्थाका प्रतिनिधिहरूको उत्साहपूर्वक सहभागिता रहेको थियो । बागलुङ सेवा समाज कतारले कतार तथा गृह जिल्ला बाग्लुङमा नियमित रूपमा यस्ता सामाजिक कार्यहरू सञ्चालन गर्दै आइरहेको छ ।
१९ मंसिर २०८२, शुक्रबार
