खोज

नवलपरासी,पश्चिम् ।

नवलपरासी जिल्लाभित्रका साप्ताहिक हाटबजार मा बिक्री वितरण हुने तरकारी, फलफूल तथा अन्य खाद्य सामग्रीहरूमा विविध प्रकारका विषादी  (केमिकल) प्रयोग भइरहेको गम्भीर अवस्था देखिएको भन्दै साप्ताहिक हाट बजार व्यवसायी सङ्घ, नवलपरासीले औपचारिक रूपमा गुणस्तर परीक्षणको व्यवस्था मिलाइदिन जिल्ला प्रशासन कार्यालयलाई आग्रह गरेको छ ।

सङ्घले प्रमुख जिल्ला अधिकारीलाई बुझाएको ज्ञापन पत्रमा तरकारी तथा फलफूलमा अनियन्त्रित र अत्यधिक विपाणि प्रयोगका कारण उपभोक्ताको स्वास्थ्य जोखिम बढ्दै गएको उल्लेख गरिएको छ। पत्रमा भनिएको छ— “यस्ता विषादी प्रयोगले क्यान्सर, पेटका रोग, छाला रोग, आँखा दुख्ने, कलेजो तथा मुटु सम्बन्धी जटिल समस्या देखिने खतरा हुन्छ ।”

सङ्घका अनुसार हाटबजारमा बिक्री वितरण हुने तरकारी तथा फलफूलमध्ये धेरै प्रतिशतमा विषादीको मात्रा स्वीकृत सीमाभन्दा धेरै माथि रहेको उपभोक्ताबाट गुनासो आइरहेको छ । तरकारीमा प्रयोग हुने रासायनिक पदार्थ धुने, भिजाउने तथा पकाउने क्रममा पनि नहट्ने भएकाले स्वास्थ्य जोखिम अझ बढ्ने सङ्घले उल्लेख गरेको छ।

झन्डै १ सय भन्दा बढी प्रकारका विषादात्मक रासायनिक पदार्थहरू तरकारी तथा फलफूलमा प्रयोग भइरहेको पाइन्छ । यस्तो विषादीले मानिसको शरीरमा दीर्घकालीन असर पार्छ।” सङ्घले विषादीको सर्वेक्षण, निगरानी र तत्काल गुणस्तर परीक्षणको व्यवस्था गर्न सम्बद्ध निकायसँग माग गरिएको सङ्घका अध्यक्ष सागर विकले बताए ।

ज्ञापन पत्रमा स्थानीय तहहरू बर्दघाट, रामग्राम, सुनवल नगरपालिका तथा प्रतापपुर, सरावल, सुस्ता र पाल्हीनन्दन गाउँपालिकालाई पनि यस्ता विपदात्मक प्रयोगको रोकथाम तथा परीक्षण प्रक्रियामा सहयोग गर्न अनुरोध गरिएको छ ।

हाट बजार व्यवसायी सङ्घले उपभोक्ताको स्वास्थ्य सुरक्षा, बजारमा गुणस्तरीय तरकारी सहज उपलब्धता तथा खाद्य सुरक्षाको सुनिश्चितताका लागि चाँडै प्रभावकारी कदम चालिनुपर्नेमा जोड दिएको छ ।