खोज

जितपुर, ४ मंसिर ।

“राष्ट्रिय स्वाधीनताको लागि राष्ट्रिय अर्थतन्त्र, राष्ट्रिय अर्थतन्त्रको लागि राष्ट्रिय औद्योगिकीकरण र व्यापार विविधिकरण” भन्ने मूल नाराका साथ आगामी मङ्सिर ५ गतेदेखि वाणगंगा–८, बोडगाउँस्थित मायादेवी रंगशालामा हुने प्रथम कपिलवस्तु व्यापारमेला तथा कृषि, पर्यटन र औद्योगिक प्रदर्शनी–२०८२ को तयारी अन्तिम चरणमा पुगेको छ ।

तयारीबारे जानकारी दिन आयोजना गरिएको पत्रकार सम्मेलनमा व्यापारमेलाका संयोजक खिमानन्द न्यौपानेले कपिलवस्तुमा पहिलोपटक आकर्षक ‘जलपरी’ शो प्रदर्शनमा ल्याइने जानकारी दिए । त्यस्तै विश्वकै अग्लो र होचो कुकुर पनि मेलाको विशेष आकर्षणका रूपमा प्रस्तुत गरिने बताउँदै उनले स्थानीय कृषि उत्पादनलाई प्राथमिकता दिइने र महिला उद्यमीलाई निःशुल्क स्टल उपलब्ध गराइने जानकारी दिए ।

सांस्कृतिक संयोजक शंकर भाट क्षेत्रीले कपिलवस्तु जिल्लाका प्रमुख धार्मिक, ऐतिहासिक तथा पर्यटकीय स्थलको फोटो प्रदर्शनी मेलामा रहने बताए । साथै स्थानीयदेखि राष्ट्रिय स्तरसम्मका कलाकारहरूको विशेष सांस्कृतिक प्रस्तुति मेला अवधि भर निरन्तर प्रस्तुतीकरण हुने उनले बताए ।

व्यापारमेलामा करिब ३५० स्टल रहने अनुमान गरिएको छ भने करिब १ लाख दर्शकले मेला अवलोकन गर्ने आयोजकको अपेक्षा रहेको छ ।

कार्यक्रममा व्यापारमेला निर्देशक कृष्ण कुवर, निवर्तमान अध्यक्ष हुमनाथ पौडेल, संरक्षक टोप नारायण बेल्बासे, महासचिव बासुदेव खनाल, पत्रकार महासंघ कपिलवस्तुका अध्यक्ष डिलाराम भुसाललगायतको उपस्थिति थियो । कार्यक्रमको सहजीकरण पत्रकार हरि घिमिरेले गरेका थिए ।