खोज

लुम्बिनी ।

लुम्बिनी क्षेत्रमा कला र सांस्कृतिक सम्पदाको संरक्षण तथा प्रवर्द्धन गर्ने उद्देश्यसहित एक महिनाको माटो तथा छ्वालीका सामग्री निर्माण तालिम सुरु भएको छ। तालिममा स्थानीय युवा, शिल्पकार तथा कला–रुचि भएका सहभागीहरूको उत्साहपूर्ण सहभागिता रहेको छ।

बुद्धकालीन मूर्ति, भाँडाकुडा तथा छ्वालीबाट उपहार–सामग्री निर्माण गर्ने सीप प्रदान गरिने यो तालिमले सिर्जनशील क्षेत्रमा युवा अभिमुखीकरणसँगै स्थानीय संस्कृति विश्वभर प्रमोट गर्ने अपेक्षा गरिएको छ।

उद्घाटन समारोहमा बोल्दै लुम्बिनी साँस्कृतिक नगरपालिकाका कार्यवाहक मेयरले विश्व सम्पदास्थल लुम्बिनीको मौलिक पहिचान जोगाउन यस्ता सीप–आधारित तालिम अपरिहार्य भएको बताए। उनका अनुसार बुद्धकालीन मूर्ति तथा भाँडाकुडा उत्पादन गरेर देश–विदेशमा बजार विस्तार गर्न सकिने भएकाले तालिमले स्थानीय रोजगारी र आर्थिक सम्भावना बढाउनेछ।

सहभागीहरूले तालिमले आफुहरूको व्यावहारिक जीवनमा महत्वपूर्ण योगदान पुर्‍याइरहेको बताउँदै आगामी दिनमा पनि यस्तै कार्यक्रम निरन्तर हुनुपर्ने आवश्यकता औंल्याए।

कार्यक्रममा लुम्बिनी विकास कोषका सूचना प्रमुख हरि ध्वज राईले लुम्बिनीको पहिचान कला, संस्कृति र बुद्ध दर्शनसँग प्रत्यक्ष जोडिएको हुँदा परम्परागत सीप संरक्षण तथा स्थानीय रोजगार सिर्जनामा यस्ता तालिम प्रभावकारी हुने धारणा राखे।

तालिममा माटो र छ्वालीबाट सामग्री बनाउने प्राचीन प्रविधि, संरचना निर्माणका चरण, अनुहार तथा अभिव्यक्तिको कलात्मक स्वरूप, बुद्धकालीन प्रतिमाको ऐतिहासिक महत्त्वलगायत विषयमा विशेषज्ञहरूले सैद्धान्तिक तथा व्यावहारिक प्रशिक्षण दिनेछन्। मूर्ति आकार मिलाउने, सतह सफाइ, कला–अनुशासन र सुरक्षा पक्षसम्बन्धी व्यावहारिक अभ्यास पनि समेटिएको छ।

लुम्बिनी होटल संघ नेपालका महासचिव पुरुत्तम अर्यालले स्थानीय सीपलाई व्यवसायिक क्षेत्रमा रूपान्तरण गर्ने लक्ष्यका साथ तालिमले सांस्कृतिक पर्यटन प्रवर्द्धनमा समेत टेवा पुग्ने विश्वास व्यक्त गरे।

कार्यक्रम नेपाल हस्तकला महासंघका उपाध्यक्ष नबिन शाक्यको अध्यक्षता, लुम्बिनी साँस्कृतिक नगरपालिकाकी कार्यवाहक मेयर कल्पना हरिजनको प्रमुख आतिथ्यता तथा होटल संघ नेपालका अध्यक्ष गोबिन्द ज्ञवालीको विशिष्ट आतिथ्यतामा सम्पन्न भयो। कार्यक्रममा लुम्बिनी विकास कोषका सूचना प्रमुख हरि ध्वज राई, पर्यटनविद् हेम बहादुर बिष्ट, चुजि फाउन्डेशन नेपालका अध्यक्ष चक्र ज्योति शाक्यलगायतको उपस्थिति रहेको थियो।

यो तालिम यूएनडीपी नेपाल, नेपाल पर्यटन बोर्डको सहयोग तथा लुम्बिनी होटल संघ नेपाल, लुम्बिनी साँस्कृतिक नगरपालिका, लुम्बिनी विकास कोष र नेपाल हस्तकला महासंघको संयुक्त आयोजनामा संचालित भएको हो।