खोज

काठमान्डौ, २ मंसिर ।

नेकपा एमाले नेतृ रामकुमारी झाँक्रीले वर्तमान सरकारले जनमतको सम्मान गर्ने वातावरण निर्माण गर्न असफल भएको टिप्पणी गरेकी छन् ।

मंगलबार अर्घाखाँचीमा प्रेस चौतारी नेपालले आयोजना गरेको पत्रकार भेटघाट कार्यक्रममा झाँक्रीले वर्तमान सरकार देशलाई लोकतान्त्रिक मार्गबाट विचलित पार्ने प्रयासमा रहेको आरोप लगाउँदै निर्वाचन गर्न इच्छुक नभएको बताइन् ।

झाँक्रीले लुटिएका हतियार र फरार कैदीबन्दी खुलेआम रहेको अवस्थामा कसरी निष्पक्ष निर्वाचन सम्भव हुने भन्दै प्रश्न उठाइन् । उनले संसद् पुनर्स्थापना गरेर लोकतान्त्रिक प्रक्रियालाई सही दिशामा अघि बढाउनुपर्नेमा जोड दिइन् ।

नेतृ झाँक्रीले लोकतन्त्रको रक्षा गर्न संसद् र निर्वाचन दुवै आवश्यक रहेको उल्लेख गर्दै, सरकारले एमाले अध्यक्ष केपी शर्मा ओलीलाई स्वतन्त्र रूपमा आउन नदिइ आफ्नो नेतृत्वलाई घेराबन्दी गर्दै निर्वाचन रोक्ने नीति अपनाएको आरोप लगाइन् ।

उनले वर्तमान सरकारले राष्ट्रिय हितविपरीत काम गर्दै देशलाई कमजोर बनाउन खोजेको पनि बताइन् । झाँक्रीका अनुसार, जेनजी लगायत सबै प्रमुख राजनीतिक दलको सहभागितामा सरकार गठन गरी निष्पक्ष र भयमुक्त वातावरणमा निर्वाचनतर्फ अघि बढ्नु आजको आवश्यकता हो ।

नेतृ झाँक्रीले संविधानको सम्मान, लोकतन्त्रको सुरक्षा र देशको भविष्यका लागि संसद् पुनर्स्थापना गरी सबै दल मिलेर निर्वाचनमा सहभागी हुनुपर्नेमा जोड दिइन् ।