खोज

काठमान्डौ, ३० कार्तिक ।

मधेस प्रदेशका ७४ जना सांसदहरूले मुख्यमन्त्री सरोज यादवको नियुक्तिविरुद्ध दायर गरेको रिटमा आजका लागि पेसी तोकिएको छ । सर्वोच्च अदालतका न्यायाधीशद्वय तिलप्रसाद श्रेष्ठ र नृपध्वज निरौलाको संयुक्त इजलासमा उक्त रिटमाथि सुनुवाइ हुने निर्धारित भएको हो ।

संविधानको धारा १६८ को उपधारा ३ बमोजिम गठन भएको वर्तमान प्रदेश सरकारविरुद्ध सांसदहरूले अन्तरिम आदेशको मागसहित रिट दायर गरेका थिए । उक्त रिट गत मंगलबार सर्वोच्च अदालतमा दर्ता भएको हो ।

यसअघि सर्वोच्च अदालतले मुख्यमन्त्री यादवलाई दीर्घकालीन प्रभाव पार्ने कुनै पनि नीतिगत निर्णय नगर्न आदेश गरिसकेको छ । न्यायाधीश टेकप्रसाद ढुंगानाको इजलासले रकी प्रसाद साहसहितले दायर गरेको रिटमा सोमबार यस्तो अन्तरिम आदेश जारी गरेको थियो ।

सर्वोच्च अदालत नियमावली, २०७४ को नियम ४९ (२) (क) बमोजिम दिएको सो आदेशले प्रदेश सरकारलाई तत्कालीन प्रकृतिका नीतिगत निर्णयबाट रोक लगाइएको छ ।

रिट निवेदनको संवेदनशीलता, सार्वजनिक महत्व तथा छरितो ढंगले टुंगो लगाउनुपर्ने प्रकृति भएकाले कुनै पनि पक्षले पेसी स्थगित गर्न नपाउने व्यवस्था सहित सर्वोच्च अदालत नियमावली, २०७४ को नियम ७३ अनुसार अग्राधिकार दिई अन्तिम सुनुवाइ मङ्सिर ११ गतेको लागि तोकिएको आदेशमा उल्लेख छ ।