खोज

काठमाडौँ ।

नेपाल आयल निगमले पेट्रोलियम पदार्थको मूल्य वृद्धि गरेको छ ।

निगमले पेट्रोलमा प्रतिलिटर दुई रुपैयाँ र डिजेल तथा मट्टीतेलमा प्रतिलिटर तीन रुपैयाँका दरले भाउ बढाएको हो ।

बढेको मूल्य गएरातिदेखि नै लागू भएको निगमले जनाएको छ । भारतीय आयल निगमबाट पेट्रोलमा प्रतिलिटर दुई रुपैयाँ ४५ पैसा र डिजेलमा छ रुपैयाँ ५३ पैसा वृद्धि भएको मूल्यसूची आएको निगमको भनाइ छ ।

त्यसैअनुसार मूल्य समायोजन गर्ने क्रममा उपभोक्तामैत्री दृष्टिकोण अपनाउँदै पेट्रोलमा दुई रुपैयाँ र डिजेलमा तीन रुपैयाँ मात्र बढाइएकाे निगमले जारी गरेको विज्ञप्तिमा उल्लेख छ ।

मूल्य वृद्धि भएपछि पहिलो वर्गअन्तर्गत चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगन्जमा अब पेट्रोल प्रतिलिटर एक सय ५८ रुपैयाँ ५० पैसा र डिजेल तथा मट्टीतेल प्रतिलिटर एक सय ४४ रुपैयाँ ५० पैसा पर्नेछ ।

दोस्रो वर्गअन्तर्गत सुर्खेत र दाङमा पेट्रोल प्रतिलिटर एक सय ६० रुपैयाँ र डिजेल तथा मट्टीतेल प्रतिलिटर एक सय ४६ रुपैयाँ कायम गरिएको छ । तेस्रो वर्गअन्तर्गत काठमाडौँ, पोखरा र दिपायलमा पेट्रोल प्रतिलिटर एक सय ६१ रुपैयाँ तथा डिजेल तथा मट्टीतेल प्रतिलिटर एक सय ४७ रुपैयाँ पुगेको छ ।

खाना पकाउने ग्यासको मूल्य भने यथावत् राखिएको निगमले जनाएको छ ।