खोज

रुपन्देही ।

बुटवलस्थित लुम्बिनी प्रादेशिक अस्पताल पछिल्ला पाँच वर्षमा सेवा विस्तार, पूर्वाधार विकास र प्रविधिक सुधारका कारण प्रदेशभरका सार्वजनिक अस्पतालका लागि सफल मोडेल बनेको छ। मेसु डा. इन्द्र ढकालको नेतृत्वमा अस्पतालले सर्जरीदेखि आकस्मिक उपचार, ओपीडी, प्रसूति सेवा, प्रयोगशाला र क्यान्सर पहिचानसमेतका क्षेत्रमा उल्लेखनीय फड्को मारेको छ।

डा. ढकालका अनुसार पाँच वर्षअघिको अवस्थासँग तुलना गर्दा आज अस्पतालले उपचार क्षमतामा ठूलो वृद्धि गरेको छ। सर्जरी २०७७÷७८ को ५ हजार ९८७बाट बढेर २०८१÷८२ मा ९ हजार ६७६ पुगेका छन्। ओपीडी सेवा १२२ हजार ८६४ बाट ३ लाख ८८ हजार ८४२ पुगेको छ। भर्ना भएर उपचार लिने संख्या १७ हजार ९०० बाट २८ हजार ३९४ पुगेको छ भने आकस्मिक सेवामा ४४ हजार ८१३बाट ७९ हजार २४३ पुगेर दोब्बर वृद्धि भएको छ। यी तथ्यांकले अस्पतालको विश्वसनीयता र जनताको भरोसा दुवै बढिरहेको स्पष्ट देखाउँछन्।

आधुनिक १२ तले भवन निर्माणाधीन रहेको अस्पतालले आगामी वर्षदेखि झनै विस्तारयुक्त र व्यवस्थित सेवा दिन सक्ने अपेक्षा गरिएको छ। अस्पताल भित्रै स्थापना गरिएको रक्त संकलन केन्द्रले सेवाग्राहीलाई रगत पाउन सहज बनाएको छ। दैनिक १५–२० जनाले मात्रै रक्तदान गरे पनि ३५–४० पोका रगत आवश्यक पर्ने भएकाले मेसु ढकालले सबैलाई नियमित रक्तदानमा सहभागी हुन आग्रह गरेका छन्। रक्त सञ्चार केन्द्र बुटवल र नेपाल रेडक्रसको निरन्तर सहयोगबिना सेवा सहज नहुने उनले उल्लेख गरे।

अस्पतालले स्तन क्यान्सरको जोखिम बढ्दै गएको अवस्थालाई ध्यानमा राखेर म्यामोग्राफी तथा ब्रेस्ट क्लिनिक सञ्चालनमा ल्याएको छ। यस प्रविधिबाट लक्षण नदेखिएको अवस्थामा पनि स्तनभित्रको सानो गाँठो र टिश्यु परिवर्तन पहिचान गर्न सकिने भएकाले महिलामा क्यान्सर प्रारम्भमै पत्ता लाग्ने र उपचारको सफलता दर बढ्ने विश्वास गरिएको छ।

स्वचालित ल्याब रिपोर्ट डिस्प्याच प्रणाली, अनलाइन टिकेटिङ, डिजिटल काउन्टर र फार्मेसीतर्फ सात क्यास काउन्टर जडान भएपछि भीड व्यवस्थापनमा ठूलो सहजता आएको छ। आकस्मिक र रात्रीकालीन सेवालाई प्रभावकारी बनाउन अस्पतालले छुट्टै ड्यूटी अफिसर व्यवस्था लागू गरेको छ, जसले राति हुने जटिल केससमेत छिटो उपचार गर्न सहयोग पु¥याइरहेको छ।

प्रसूति सेवाका लागि छुट्टै भवन र शल्यक्रिया कक्ष विस्तारपछि मातृत्व सेवामा गुणस्तर र सहजता दुवै बढेको अस्पतालले जनाएको छ। अस्पतालका मेसु डा. ढकालले निरन्तर सुधार, सेवा विस्तार र प्रविधिक आधुनिकताकै कारण लुम्बिनी प्रादेशिक अस्पताल प्रदेशभरका सरकारी अस्पतालका लागि सफल उदाहरण बन्दै गएको प्रतिक्रिया दिएका छन्।