खोज

काठमाडौँ ।

नेपाली कांग्रेसको संस्थापन पक्षका २५ केन्द्रीय सदस्यहरूले पार्टीको १५ औँ महाधिवेशनका सन्दर्भमा ७ बुँदे माग राख्दै पार्टी केन्द्रीय कार्यालय सानेपामा ज्ञापनपत्र बुझाएका छन् ।

ज्ञापनपत्र बुझाइएको कुरा केन्द्रीय सदस्य उदय शमशेर राणाले जानकारी गराए ।

ज्ञापनपत्रमा सरकारले फागुन २१ गतेका लागि तय गरेको प्रतिनिधिसभा निर्वाचनलाई परिणाममुखी बनाउन पार्टीको १५ औँ महाधिवेशन मङ्सिर १५ गतेभित्र सुरु गर्नुपर्ने माग राखिएको छ ।

‘आसन्न २०८२ साल फागुन २१ गते हुने निर्वाचनलाई परिणाममुखी बनाउन पार्टी विधानअनुसार २०८२ साल मङ्सिर महिनाभित्र १५ औँ महाधिवेशन प्रारम्भ गरी तहगत रूपमा अधिवेशन सम्पन्न गर्न कार्यतालिका बनाई लागू गर्नुपर्छ,’ ज्ञापनपत्रमा उल्लेख गरिएको छ ।

त्यस्तै, महाधिवेशन सम्पन्न गर्ने पहिलो चरणका रूपमा क्रियाशील सदस्यता नवीकरण र नयाँ सदस्यता वितरण कार्यलाई तोकिएको समयभित्र टुंग्याउनुपर्ने माग गरिएको छ ।

साथै, युवा पुस्ताको उल्लेखनीय प्रतिनिधित्व सुनिश्चित हुने गरी विधान संशोधन गर्ने, पार्टीको आन्तरिक निर्वाचन समितिलाई अविलम्ब पूर्णता दिने, र १५ औँ महाधिवेशनमार्फत सबै तहमा युवा, महिला, दलित, आदिवासी जनजाति, थारु, मधेसी, मुस्लिम, पिछडियाका वर्ग र अपाङ्गता भएका व्यक्तिहरूको अर्थपूर्ण सहभागिता सुनिश्चित गर्नुपर्ने मागसहितका बुँदाहरू समावेश छन् ।

स्थानीय, प्रदेश र संघीय तहका निर्वाचनमा समानुपातिक समावेशिताका सिद्धान्तअनुसार युवा उमेर समूहलाई पनि उम्मेदवार बनाउने प्राथमिकता दिनुपर्ने तथा संविधान संशोधनका विषयमा वडादेखि केन्द्रीय तहसम्म व्यापक संवादसहित पार्टीको स्पष्ट अवधारणा निर्माण गर्नुपर्ने माग पनि ज्ञापनपत्रमा छ ।

१५ औँ महाधिवेशनसम्बन्धी मुद्दासँगै, भदौ २३ र २४ गते भएका घटनाको निष्पक्ष छानबिन गरी दोषीलाई कानुनअनुसार कारबाही गर्न पनि माग गरिएको छ ।