काठमाडौँ ।
मधेस प्रदेश सभाका दुई सांसदमाथि कारबाही प्रक्रिया अघि बढाइएको छ ।
तत्कालीन मुख्यमन्त्री जितेन्द्र सोनललाई विश्वासको मत दिने विषयमा पार्टी ह्विपविरुद्ध उभिएको भन्दै नेकपा माओवादी केन्द्र, मधेस प्रदेशले आफ्ना दुई सांसदमाथि कारबाही प्रक्रिया अघि बढाएको हो ।
विश्वासको मतको दिन आह्वान गरिएको प्रदेश सभा बैठकमा पार्टीको ह्विप विपरीत उभिएर विश्वासको मत नदिने घोषणा गरेका प्रदेश सभा सदस्य रहबर अन्सारी र मालाकुमारी कर्णमाथि माओवादी केन्द्रले कारबाही प्रक्रिया अघि बढाएको दलका संसदीय दलका नेता भरत साहले जानकारी दिए ।
यी दुई सांसदकै कारण पाँच दलीय गठबन्धनको समर्थनमा बनेको लोसपा नेता जितेन्द्रप्रसाद सोनल नेतृत्वको सरकार ढलेको थियो । पार्टीको ह्विप विपरीत यी सांसद उभिए पनि तत्कालीन मुख्यमन्त्री सोनलले प्रदेश सभाबाटै राजीनामा दिएका थिए ।
माओवादी केन्द्र संसदीय दलका नेता तथा पूर्वमन्त्री साहका अनुसार पार्टीको ह्विप उल्लङ्घन गरी प्रदेश सभाको बैठकमा वितण्डा मच्चाउने कार्य गैरसंवैधानिक र पार्टी अनुशासन विपरीत भएकाले दुवै सांसदमाथि संगठनात्मक कारबाही प्रक्रिया अघि बढाइएको हो ।
साहले भने, ‘पार्टीको निर्णय विपरीत आचरण गरेकाले केन्द्रीय समितिले उनीहरूलाई साधारण सदस्य समेत नरहने गरी कारबाहीको निर्णय गरिसकेको छ ।
केन्द्रबाट आधिकारिक पत्र आएलगत्तै प्रदेश सभामा उनीहरूको पद खारेजका लागि सिफारिस गरिनेछ ।’
