खोज

सुर्खेत,२७ कात्तिक ।  

कर्णाली प्रदेशसभा पुनर्निर्माणको तयारी थालिने भएको छ ।

जेन– जीको आन्दोलनको क्रममा भएको  आगलागीबाट ध्वस्त पारिएको प्रदेशसभा पुनर्निर्माण गर्ने निर्णय गरिएको हो । आगामी माघको अन्तिम सातासम्म पुनर्निर्माण गर्ने गरि तयारी थालिएको प्रदेशसभा सचिवालयले जनाएको छ ।

प्रदेशसभाको भवन पुनर्निर्माणको लागि २० लाखसम्म लागत लाग्ने स्टिमेट गरिएको प्रदेशसभा सचिवालयका सचिव जिवराज बुढाथोकीले जानकारी दिए ।

‘हामी आगामी माघ २१ गते प्रदेशसभाको बैठक बस्ने तयारी गरेका छौ त्यति बेलासम्म पुनर्निर्माणको काम गरिसक्ने तयारी छ’ सचिव बुढाथोकीले भने, ‘प्रदेशसभाको भवन आगलागी भएपछि प्रदेशसभाको बैठक बस्न सकेको छैन ।’

प्रदेशसभा पुनर्निर्माणका लागि कार्य व्यवस्था तथा परामर्श समिति बैठक बसेको उनले जानकारी दिए । सभामुख नन्दा गुरुङको अध्यक्षतामा बसेको बैठकले चालु आर्थिक वर्षको नियमित बजेटबाट पुनर्निर्माण गर्ने निर्णय गरेको हो ।

सभामा आगलागीपछि पहिलो पटक बसेको यो बैठकले सुरुवातमा सचिवालय र दलका पदाधिकारीहरूको कार्यालय पुनर्निर्माण गर्ने निर्णय गरेको छ ।

कार्य व्यवस्था तथा परामर्श समिति बैठकमा आगामी माघ २१ गते प्रदेशसभाको हिउँदे अधिवेशन सुरु हुनु पूर्व नै पुनर्निर्माण सुरु गर्ने निर्णय भएको प्रदेशसभा सचिवालयका सचिव बुढाथोकीले जानकारी बताए ।

पहिलो चरणमा सचिवालय र प्रदेशसभामा सहभागी दलका पदाधिकारीको कार्यालय पुनर्निर्माण गर्ने सहमति भएको उनले बताए । भवनको पुनर्निर्माणको लागि प्रदेश सरकारसँग अनुरोध गरिएको बुढाथोकीले जनाए ।