दाङ ,२७ कात्तिक ।
गत भदौ २३ र २४ गते देशव्यापी रूपमा जेनजी समूहले गरेको आन्दोलनका क्रममा दाङमा भएका आगजनी, ढुङ्गामुढा र तोडफोड घटनामा संलग्न आरोपमा दश जना पक्राउ परेका छन् ।
तुलसीपुर र घोराहीमा भएका छुट्टाछुट्टै घटनामा संलग्न व्यक्तिहरूलाई पक्राउ गरिएको जिल्ला प्रहरी कार्यालय दाङका प्रहरी प्रवक्ता चक्रबहादुर शाहले जानकारी दिए ।
उनका अनुसार उच्च अदालत तुलसीपुर र अस्थायी प्रहरी पोष्ट बसपार्क तुलसीपुरको कार्यालय भवनमा ढुङ्गामुढा, तोडफोड, आगजनी, लुटपाट तथा चोरी गरी क्षती पुर्याउनेमा संलग्न तुलसीपुर उपमहानगरपालिका–७ राजापुरका २६ वर्षीय रुपेश नेपाली, सल्यान बागचौर–२ घर भई तुलसीपुर–९ बेलुवाका १८ वर्षीय सुनिल वली, तुलसीपुर–५ बसपार्कका २० वर्षीय करण सुनार, सोही ठाँउका अन्दाजी १८ वर्षीय मुकेश भण्डारी र तुलसीपुर–६ शान्तिनगर टोलका १८ वर्षीय ज्ञानेन्द्र गन्धर्व पक्राउ परेका छन् ।
यस्तै दाङ जिल्ला अदालत र जिल्ला ट्राफिक प्रहरी कार्यालयमा तोडफोड तथा आगजनीमा संलग्न आरोपमा थप पाँच जना पक्राउ परेका छन् । दाङ जिल्ला अदालत भवनमा क्षति पुर्याउने आरोपमा तुलसीपुर–१ भम्केका २५ वर्षीय नविन नेपाली, अर्घाखाँची छत्रदेव गाउँपापालिका–७ काउले घर भई हाल घोराही–१४ नयाँवजार डेरा गरी बस्ने ३७ का कृष्ण पाण्डे पक्राउ परेको डिएसपी शाहले बताए ।
डिएसपी शाहका अनुसार जिल्ला ट्राफिक प्रहरी कार्यालयमा आगजनी र तोडफोडमा संलग्न रहेको आरोपमा घोराही–१५ मिलनचोकका १८ वर्षीय हैदर अली, सोही ठाँउका ३० वर्षीय आकाश गिरी र घोराही–३ भानपुरका ४७ वर्षीय बसन्त अधिकारी पक्राउ परेका छन् ।
पक्राउ परेकामाथि आपराधिक प्रवेश तथा आपराधिक उपद्रवसम्बन्धी मुद्दामा जिल्ला अदालत दाङबाट म्याद थप गरी अनुसन्धान भइरहेको दाङ प्रहरीले जनाएको छ ।
प्रहरीका अनुसार उच्च अदालत तुलसीपुर, जिल्ला अदालत दाङ र अस्थायी प्रहरी पोष्टमा संलग्न सात जनामाथि पाँच दिन र जिल्ला ट्राफिक प्रहरी कार्यालय घोराहीमा संलग्न तीन जनामाथि सात दिनको म्याद भई थप अनुसन्धान भइरहेको प्रहरीले जनाएको छ
१९ मंसिर २०८२, शुक्रबार
