खोज

नवलपरासी, २६ कात्तिक ।

मतदाता नामावली सङ्कलन गर्ने समय जति सकिँदै जाँदा जिल्ला स्थित निर्वाचन कार्यालयमा मतदाता नामावलीका लागि फोटो खिचाउनेको भिडभाड बढ्दै गएको छ ।

सुरु सुरुमा नआउने तर समय सकिँदै जाँदा मतदाता नामावलीका लागि कार्यालयमा भिडभाड लाग्ने नेपालीहरूकै प्रवृत्ति भएको निर्वाचन कार्यालयका कर्मचारीहरूले बताउन थालेका हुन् ।

जेनजी आन्दोलन पश्चात् बनको नागरिक सरकारले फागुन २१ सङ्घीय संसद् प्रतिनिधिसभाको निर्वाचन तोकेको थियो । निर्वाचन आयोगले त्यसका लागि थालेको निर्वाचन प्रक्रिया अनुसार नै अहिले मतदाता नामावलीमा नास समावेश गराउने र मतदान गर्ने स्थान परिवर्तन गराउन चाहनेका लागि निर्वाचन कार्यालयले काम सुरु गरे पनि कात्तिकको दोस्रो साता देखी मात्र भिडभाड हुने गरेको छ ।

आन्दोलन पश्चात् दसैँ तिहार,छठ जस्ता चाडपर्वले पनि मानिसको व्यस्तता तथा बिदाले पनि निर्वाचन कार्यालयमा भिडभाड कम हुने गरेको तर अहिले दिनहुँ बिहान ९ बजे देखी नै भिड हुने गरेको कार्यालयले जनाएको हो ।

निर्वाचन कार्यालयमा मतदाता नामावलीमा समावेश गराउने कार्य बर्सेनि अद्यावधिका लागि काम हुने गरे पनि विगत वर्ष देखी छुटेका व्यक्ति पनि अहिले नाम समावेश गराउन आउने गरेको उनीहरूको भनाई थियो ।

निर्वाचन बारे विभिन्न दलका फरक फरक प्रतिक्रिया आई रहे पनि निर्वाचनका लागि जनता उत्साही नै देखिएका छन्, निर्वाचनमा भाग लिन पाउनु नागरिकको अधिकार नै हो, नागरिक समाजका सचिव अनिल अग्रहरीले भने, अहिले दलको प्रचार प्रसार भन्दा नागरिक आफै उत्साही भएर मतदाता नामावलीमा नाम समावेश गराउन आउने गरेका छन् ।

२०८२ कात्तिक १६ गतेसम्म १८ वर्ष उमेर पुरा भएका नागरिकले मतदान गर्न पाउने छन् । उनीहरूको नामा समावेश गर्ने कार्य भई रहेको छ ।

कार्यालयका अनुसार नामर्दता गर्ने प्रक्रियाका लागि जिल्ला निर्वाचन कार्यालय वा निर्वाचन आयोगले तोकेको मतदाता नामावली दर्ता स्थलमा नेपाली नागरिकताको प्रमाणपत्र साथै लिई जानुपर्दछ ।

नागरिकताको प्रमाणपत्रमा रहेकोभन्दा भिन्नै ठेगानामा हाल स्थायी बसोबास गरेको भए नागरिकता प्रमाणपत्रको अतिरिक्त देहायका प्रमाणहरूसमेत पेस गर्नुपर्दछ ।

त्यसैगरि बसाई सरी आएको प्रमाणपत्र, वा विवाह गरी हालको स्थायी ठेगानामा आएको हकमा विवाह दर्ता प्रमाणपत्र, कुनै व्यक्तिको नाम मतदाता नामावलीमा दर्ता गर्दा निजको जन्म वा उमेर वा वासस्थान नागरिकताको प्रमाणपत्र बाट मात्र खुल्न नसकेमा नाम दर्ता अधिकारीले थप प्रमाणको रूपमा जग्गा धनी प्रमाण पुर्जा वा शैक्षिक योग्यताको प्रमाणपत्र वा राहदानी वा सवारी चालक अनुमति पत्र माग गर्न सक्नेछ ।

उक्त प्रमाणहरू पेस गर्न नसकेमा नाम दर्ता अधिकारीले त्यस्तो व्यक्ति सँग सम्बन्धित गाउँपालिका वा नगरपालिकाको सम्बन्धित वडाको सिफारिस माग गर्न सक्दछ,. आयोगले तोकेको मतदाता नामावली सङ्कलन फाराम भर्नुपर्दछ । . तोकिएबमोजिम फोटो खिचाउनुपर्दछ । फोटोको लागि कुनै शुल्क तिर्नुपर्दैन ।

औँलाहरूको रेखात्मक छाप दिनुपर्दछ । यस्तो औँला छाप विद्युतीय माध्यमबाट सङ्कलन गरिन्छ । दर्ता सम्पन्न भइसकेपछि दर्ता कर्मचारीबाट प्राप्त हुने अर्धकट्टी आफ्नो नाम दर्ता गरेको प्रमाण स्वरूप सुरक्षित राख्नुपर्दछ । मतदाता नामावली मतदाताको स्थायी बसोबासको ठेगानामा दर्ता गरिन्छ ।