खोज

काठमाडौं, २६ कात्तिक ।

निवर्तमान गृहमन्त्री रमेश लेखकले अन्तरिम सरकारले आफूलाई स्थानहद निर्धारण गरेको र राहदानी रोक्का गरेको विषयमा कुनै जानकारी नभएको बताएका छन् ।

नेपाली कांग्रेसको केन्द्रीय कार्यसमिति बैठकमा उनले बुधबार आफूलाई स्थानहद निर्धारण गरिएको र राहदानी रोक्का गरिएको विषयमा सरकारतर्फबाट लिखित वा मौखिक कुनै पनि जानकारी नदिइएको बताए ।

‘मलाई आजसम्म सरकारको वा सरकारका कुनै निकायले लिखित रूपमा या मौखिक रूपमा स्थानहद गरेको वा पासपोर्ट रोक्का गरेको जानकारी दिएको छैन, सूचना दिएको छैन, सोधेको छैन, किन रोक्का गर्ने वा नगर्ने भनेर,’ लेखकले भने ।

‘कुन संविधान, कुन कानुन, कुन ऐनको कुन प्रावधान बमोजिम, के औचित्यका लागि, कति अवधिका लागि मलाई स्थानहद गरियो भन्ने कुरा मलाई जानकारी छैन ।’

लेखकले दुई महिना अघि आफू र निवर्तमान प्रधानमन्त्री केपी शर्मा ओलीलाई स्थानहद तोकेर राहदानी रोक्का गरिएको निर्णय समाचारमार्फत मात्र थाहा पाएको बताए ।

‘निवर्तमान प्रधानमन्त्री र म लगायतलाई स्थानहद गरिएको छ रे । अनि पासपोर्ट रोक्का गरिएको छ रे,’ पूर्वगृहमन्त्री लेखकले भने ।

लेखकले जेनजी आन्दोलनमा राज्य पक्षबाट भएको दमनको जिम्मेवारी लिन अस्वीकार गरेको पनि बताएका छन् । बैठकमा घटनाबारे ब्रिफिङ गर्दै उनले सुरक्षा संयन्त्रलाई कुनै अप्रिय घटना नहोस् भनेर सजग गराएको दाबी गरे ।

‘प्रधानमन्त्री र मन्त्रीले त्यो आदेश दिनुपर्ने विषय होइन, दिनु पनि पर्दैन । मैले क्याजुलिटी नहोस् भनेर २२ गते साँझ मिटिङमा पनि भनेको छु,’ लेखकले बैठकमा भने । ‘दोस्रो दिन बिहान पनि मैले गृहसचिव र दुवै प्रहरीका आईजीपीलाई क्याजुलिटी नहोस् भनेर स्पष्ट निर्देशन दिएको छु । क्याजुलिटी कुनै पनि हालतमा हुनुहुन्न, पटक–पटक भनेको छु । त्यो कुरा नेपाल प्रहरीका महानिरीक्षकले सञ्चारमाध्यममा व्यक्त पनि गर्नुभएको छ ।’