खोज

बुटवल, २६ कात्तिक ।

सैनामैना नगरपालिकाका कार्यपालिका सदस्य एवं दलित उत्थान संघ सैनामैनाका संस्थापक अध्यक्ष सुरज बरालले एक दलित महिलालाई जग्गा विक्रि गरेपनि जग्गा नदिएको पीडितले गुनासो गरेकी छन् ।

बरालले बुटवल –२ बस्ने राधा नेपालीलाई तिलोत्तमा ११ भूपू सैनिकको १० धुर अव्यवस्थित जग्गा चार लाख ५० हजार रुपैयांमा विक्रि गरेपनि जग्गा भने नदिएको पीडित नेपालीले गुनासो गरेकी छन् ।

नेपालीले बुधबार पत्रकार सम्मेलन गरी २०७७ सालमा किनेको जग्गामा बरालले जालझेल गरी उक्त जग्गा नदिई खोलाले कटान गरेको अपुग जग्गा र भूमि आयोगले नापजांच नगरेको जग्गा लिन दबाब दिएको तर आफूले त्यस्तो जग्गा स्वीकार नगरेको बताइन् ।

बरालको उक्त ठाउंमै अझै १० कठ्ठा बढी जग्गा रहेको भएपनि रकम बुझेको बर्षौंसम्म आफूले दिन लिखित कबोल गरेको १० धुर जग्गा नदिएर दुख दिएको उनले गुनासो गरिन् । ‘भूमि आयोगले नापचांच गरेर पछि लालपुर्जा पाइने जग्गा भनेर मैले ऋणधन गरेर जग्गा किनेकी हुं,तर उहांले कहिले खोलाले कटान गरेको ५ धुर जग्गा त कहिले आयोगले नापचांच नगरेको जग्गा लैजाउ भनेर जालझेल र आलटाल मात्रै गर्नुभयो’–राधाले भनिन्–‘यही जग्गाको लागि विभिन्न निकायमा धाउंदा मेरो थप एक लाख जति खर्च भइसक्यो,यही जग्गाको लफडाले परिवारमा पनि बिग्रह भयो, स्कूलको जागिर पनि छाड्न प¥यो, अहिले ज्यादै पीडामा छु ।’

राजनीतिक पहुंच र शक्तिको आडमा आफूलाई बरालले आफूलाई ठगेको र वर्षौं सास्ती दिएकाले अब जग्गा नलिने बरु अहिलेको चलतचल्तीको मूल्य अनुसार पैसा फिर्ता फिर्ता दिनुपर्ने माग गरिन् ।

बरालले आफूलाई जातसंग जोडेर असभ्य भाषा प्रयोग गरेर धम्की दिने गरेको समेत राधाले दावी गरिन् । ‘म माथि अन्याय भएको छ, न्यायका लागि सरोकारवाला निकाय, दलित अगुवाको साथ खोजेकी छु’–उनले भनिन्–‘दलित समुदायको अगुवा भन्ने तर दलित समुदायकै सोझा साझा महिलालाई यसरी दुख दिने र हेप्ने कामले निकै पीडा भएको छ ।’

आफूलाई तिलोत्तमा वडा नं ११ का वडाध्यक्ष विष्णु बरालले भने समस्या समाधानका लागि निकै सहयोग गरेको तर सफल नभएको उल्लेख गरिन् । वडाध्यक्ष बरालले एकजना सोझी दलित समुदायकी महिलालाई दलित अगुवा र जनप्रतिनिधिले ठग्नु र दुख दिनु सह्य र क्षम्य विषय नभएको बताए ।

‘जग्गा दिने भनेर रकम बुझेको वर्षौं हुंदासम्म नदिनु अचम्मको विषय भयो,उहांले कि भने अनुसारको जग्गा दिनुपर्छ कि पैसा दिनुपर्छ,यसरी दुख दिन पाइदैन’–बरालले भने–‘यस्तो कुराले दलित अगुवा र जनप्रतिनिधिकै बेइज्जत गराउंछ ।’ सुरज बरालले भने आफूले जग्गा दिएको तर उनले नलिएको बताए । ‘जग्गा दिएको छु,फिल्डमा जग्गा नभएको भए जवाफदेही हुन्छु’–बरालको दावी छ ।

राधालाई बुटवल ११ की जमुना सुनारले जग्गा किन्नका लागि देखाइदिएकी राधाले बताइन् । जग्गा किनबेचको कागजमा सुनार, सौगात बराल,दिलिप पुन,धनबहादुर कुंवर साक्षी छन् । जग्गा किनबेचके कागज गरेवापत राधाले टोल विकास संस्थालाई १३ हजार रुपैयां शुल्क तिरेको बताइन् ।