खोज

चन्द्रौटा, २४ कार्तिक ।

कपिलवस्तुको एक तालको सतहले सुनौलो बिहान थपिएको छ ।

वरिपरि हरियालीले घेरेको शान्त वातावरण रहेको स्थान बृजा ताल । त्यसैबिच तालको जल सतहमा पहिलो पटक स्टिमर बोटको गुञ्जन सुन्न र देख्न सकिन्छ – जसले बुद्धभूमि नगरपालिकाको पर्यटन यात्रामा नयाँ पाना पल्टाएको छ ।

बुद्धभुमि नगरपालिका वडा नम्बर–९, बरकुलपुरस्थित यो ऐतिहासिक मानव निर्मित ताल सन् २०१७ सालतिर सिँचाइका लागि निर्माण गरिएको थियो । तर आज यो केवल सिँचाइको स्रोत मात्र होइन, स्थानीयको गर्व, पहिचान र सम्भावनाको पर्यटकीय गन्तव्यको केन्द्र समेत बनेको छ ।

‘हरियाली सामुदायिक वन’ को पहलमा बृजा पार्कसहित संरक्षण कार्य सम्पन्न भएपछि यो तालमा पहिलो पटक स्टिमर सञ्चालन गरिएको हो ।

बुद्धभूमि नगरपालिका वडा नम्बर–९ का वडा अध्यक्ष प्रमोद आचार्यले बोटको रिबन काट्दै भने  “यो ताल केवल पानीको स्रोत होइन, हाम्रो पहिचान हो । स्टिमर सञ्चालनले पर्यटन, रोजगारी र स्थानीय अर्थतन्त्रमा नयाँ ऊर्जा भर्नेछ ।” आफ्नै गाउँको तालमा स्टिमर घुमाउने सपना अब पुरा भएको स्थानीय विष्णु थारु बताउँछन् ।

बुद्धभूमि नगरपालिका–३ का वडा अध्यक्ष गोविन्द प्रसाद आचार्यले बृजा ताललाई दीर्घकालीन पर्यटन केन्द्रका रूपमा विकास गर्नका लागि नगरपालिकाको सहकार्य अपरिहार्य भएको बताए ।

“जब प्रकृति र विकास हातेमालो गर्छन्, त्यतिबेला यस्तो परियोजनाले दीर्घकालीन प्रभाव पार्छ” उनले भने ।  स्थानीयको उत्साह त्यत्तिकै उल्लेखनीय रहेको छ । बरकुलपुरका युवा सन्तोष थारू भन्छन्ः “अब बृजा ताल घुम्न आउने मानिसहरू बढ्नेछन् । यसले होटल, पसल र यातायातमा कामको अवसर ल्याउनेछ ।”

बृजा तालको संरक्षण र व्यवस्थापनको जिम्मा ‘हरियाली सामुदायिक वन उपभोक्ता समूह’ ले लिएको छ । वन उपभोक्ता समूहकी अध्यक्ष मिना थारूले ताल र पार्क क्षेत्रले गाउँमा नयाँ आर्थिक सम्भावना ल्याएको बताइन् ।

“यो ताल हाम्रो गर्व हो । अब यसलाई पर्यटनसँग जोडेर गाउँको विकासमा रूपान्तरण गर्ने हाम्रो लक्ष्य छ” उनले भनिन् । स्टिमर सञ्चालनसँगै यो क्षेत्रलाई व्यवस्थित घुम्ती स्थलका रूपमा विकास गर्ने तयारी भइरहेको ९ नम्बर वडा कार्यालयले जनाएको छ ।

स्टिमरको मधुर आवाजसँगै बृजा ताल अब केवल प्रकृतिको सुन्दरता होइन । परिवर्तनको प्रतीक बनेको छ । यहाँको हरियाली, चरा–चराको हव र तालमा परिवर्तित आकाश–यी सबैले आगन्तुकलाई केही बेर शान्तिको अनुभव गराउँछन् ।

स्थानीय वडाले आगामी दिनमा यहाँ घुम्ती स्थल, पिकनिक स्पट र रातो बल्ब बत्तीका सुविधा थप्ने तयारी गरेको छ । बृजा ताल अब बुद्धभूमिको नयाँ पहिचान बनेको छ । जहाँ पानीको छालसँगै विकास र आशाको लहर पनि सम्भावना उत्तिकै सञ्चिएको छ ।