खोज

सुनवल, २३ कार्तिक ।

पश्चिम नवलपरासीको रामग्राम र सरावलमा प्रदेश सरकारले सुरु गरेर अलपत्र पारेका पुल र सडकका आयोजनाका विषयमा लुम्बिनी प्रदेशको भौतिक पूर्वाधार मन्त्रालयले चासो दिएको छ ।

केही दिन अगाडी रामग्राम नगरपालिकाका नगर प्रमुख धनपत यादव सहित स्थानीयको टोली प्रदेश मन्त्रालयमा पुगेर अलपत्र पुलको काम तत्काल सुरु गर्न दबाब दिएपछि भौतिक पूर्वाधार विकास मन्त्री भूमिश्वर ढकाल, सचिव भिमार्जुन पाण्डे सहितको टोली परासी आएर तत्काल काम सुरु गर्ने प्रतिबद्धता जनाएका हुन् ।

मन्त्रालय, स्थानीय जनप्रतिनिधि, ठेकेदार पक्ष, सुरक्षा निकाय बिच भएको छलफलमा अलपत्र योजनाको काम तत्कालै सुरु गर्ने लिखित प्रतिबद्धता गरिएको छ ।

विशेष गरी रामग्राम वडा नम्बर १५ स्थित तुरिया खोलामा निर्माणाधीन पुलको डिजाइन फेल भएपछि तीन वर्ष देखि अलपत्र छ । उक्त पुलको लागी अब थप समय उपलब्ध गराउन नसकिने मन्त्रालयको चेतावनी पछि निर्माण कम्पनी ओम ईन्फाटेक प्रा.लीले एक हप्ता भित्र काम सुरु गर्ने लिखित प्रतिबद्धता जनाएको छ ।

सो क्रममा रामग्राम नगरपालिकाका नगर प्रमुख यादवले सो क्षेत्र हुँदै बुहआयमिक महत्वको सडक निर्माण भइरहेकाले पुलकै कारण दातृ निकायले गरेको लगानी रोकिन नहुने तर्फ ठेकेदार र मन्त्रालयको ध्यानाकर्षण गराए ।

ठेकेदार कम्पनीले डिजाइनका कारण काम रोकिएको बताउँदै अब एक हप्ता भित्र काम सुरु गर्ने प्रतिबद्धता जनाएको छ । २०७७ सालमा निर्माण सुरु भएको उक्त पुल डेढ वर्षमा निर्माण सकिनुपर्ने भए पनि हाल सम्म पुरा भएको छैन ।

छलफलमा मन्त्री ढकाल र मन्त्रालयको टोली सहित प्रदेश सभा सदस्यद्धय खड्ग बस्नेत र वैजनाथ कलवार, रामग्राम नगर प्रमुख धनपत यादव, प्रमुख जिल्ला अधिकारी कृष्ण प्रसाद लम्साल, रामग्रामका प्रमुख प्रशासकीय अधिकृत भूपेन्द्र पाण्डेय, सडक पूर्वाधार विकास कार्यालयका प्रमुख हितेन्द्र रायमाझी र ठेकेदार पक्ष सहभागी थियो ।

यसै गरी सरावलमा अलपत्र दुई वटा सडक आयोजना मङ्सिर दश गते भित्र सम्पन्न गर्ने प्रतिबद्धता नवीन कन्स्ट्रक्सन नवलपरासीले गरेको छ । सरावल गाउँपालिका जोड्ने पहुँच मार्गको म्याद तीन वर्ष अगाडि नै सकिए पनि हाल सम्म काम पुरा भएको छैन ।

२०७९ सालको असारमै म्याद सकिएको उक्त आयोजनाको म्याद थप समेत भएको छैन । सो सडक आयोजनाका कारण स्थानीय देखि प्रदेश सरकारका जनप्रतिनिधिले आलोचना खेप्नुपरेको छ ।

सरावल गाउँपालिकाका अध्यक्ष सुखाडी प्रसाद चौधरीले जति काम गरे पनि सोही सडकका कारण सबै बालुवामा पानी सरह भएको गुनासो गरे ।

यसै गरी सरावलकै तुल्सीनगर–तिलकपुर खोकरपुरा–पटनी–भिमटाडी सडकको म्याद पनि तीन वर्ष अगाडी नै सकिएको हो । उक्त सडक पनि हाल सम्म अलपत्र अवस्थामा छ । सो सडकको काम पनि तत्काल सुरु गर्ने प्रतिबद्धता ठेकेदारले गरेको छ ।

तर ती सडकका विषयमा ठेकेदारले पटक पटक प्रतिबद्धता जनाए पनि काम पुरा भएको छैन । आर्थिक रूपमा कमजोर भएका कारण काम गर्न कठिनाइ भइरहेको ठेकेदार पक्षको भनाई छ ।

सो क्रममा भौतिक पूर्वाधार मन्त्री ढकालले यो वा त्यो बहानामा काममा ढिलासुस्ती हुन नहुने बताए । प्रदेशले बजेट लगानी गरेका आयोजना सम्पन्न नहुँदा प्रदेश प्रति नै वितृष्णा बढ्न थालेको बताउँदै रुग्य आयोजनाका सन्दर्भमा मन्त्रालय निर्मम रूपमा प्रस्तुत हुने जानकारी दिए ।

सो क्रममा प्रदेश सभा सदस्य बस्नेतले ठेकेदार सम्पर्कमै नहुने प्रवृत्तिको अन्त्य हुनुपर्ने बताए । अर्का प्रदेश सभा सदस्य कलवारले ठेकेदारलाई काममा सहजीकरण गरिने तर समयमै काम सम्पन्न गर्न अग्रसर हुनुपर्नेमा जोड दिँदै अपजस भोग्नुपर्ने वातावरण नबनाउन आग्रह गरे ।

प्रदेशले सुरु गरेका आयोजना अलपत्र पर्दा जनप्रतिनिधिले अपजस खेप्दै आएका छन् ।