खोज

काठमाडौँ ।

नेकपा एमालेका अध्यक्ष केपी शर्मा ओलीले जेनजेड युवाहरूले भदौ २३ गते गरेको आन्दोलन खोसाखोस माइतीघरबाटै सुरु भएको बताएका छन् ।

आइतबार राष्ट्रिय युवा सङ्घको तेस्रो पूर्ण बैठकलाई सम्बोधन गर्दै अध्यक्ष ओलीले युवाहरूलाई भड्काउन र युवा सेन्टिमेन्ट बढाउन ‘जेनेरेसन जेड’ भनेर प्रचार गरिएको समेत बताए ।

“युवाहरूले राम्रा माग राखेर भदौ २३ गते आन्दोलन आह्वान गर्नुभएको थियो,” पूर्वप्रधानमन्त्री समेत रहेका अध्यक्ष ओलीले भने, “माइतीघरदेखि नै युवाहरूका माग र मुद्दा खोसाखोस चलिरहेको थियो ।”

उनले दाबी गरे कि युवाहरू माइतीघर मण्डलामा पुग्नुभन्दा अघि नै उनीहरूका मुद्दा, माग र आन्दोलन खोस्ने तत्वहरू त्यहाँ जम्मा भइसकेका थिए ।

“युवाहरूले जसोतसो होटल एभरेष्टसम्म आन्दोलनलाई पुर्‍याएका थिए,” ओलीले भने, “त्यसपछि निषेधाज्ञा तोड्ने, ब्यारेकेट तोड्ने, अवज्ञा गर्ने र भिडन्तको राजनीति गर्ने काम भयो ।”

अध्यक्ष ओलीका अनुसार, युवाहरूका जायज मागहरूलाई भुईँमा क्षतविक्षत गर्ने गरी पछारिएको र अरू उग्रवादी धारणा तथा मागका क्रियाकलाप अगाडि बढाइएको थियो ।

“युवाका नाममा विध्वंस अरूले मच्चाए । २४ गते देशभरी जुन आगलागी र तोडफोड भयो, त्यो अगाडिदेखि नै सर्वे गरेर चिह्न लगाएर पठाइएको थियो । त्यो २३ गतेको प्रतिक्रिया होइन, तयारी हो,” ओलीले भने ।

अध्यक्ष ओलीले जेनजेड आन्दोलनका नाममा कोही पानी खुवाएर, त कोही काला ज्याकेट लगाएर नेता बनेको भन्दै, तिनलाई मन नपर्ने समाचार दिनासाथ सञ्चारकर्मीलाई धम्की आउन थालेको बताए ।

उनले सञ्चारकर्मीको सुरक्षा युवा सङ्घले सुनिश्चित गर्नुपर्ने, र प्रहरी तथा जनता त्रसित भएको अवस्थामा युवा सङ्घले आश्वस्त पार्न सक्नुपर्ने बताए ।

अन्त्यमा, ओलीले भने कि युवाहरूको नाममा भएको प्रतिगमनमा सहभागी भएको अपराधिक तत्वहरू युवाहरू भए पनि कुनै जिम्मेवार र सङ्गठित युवा नभएका हुन् ।