खोज

काठमान्डौ, २३ कार्तिक ।

चारदलीय समाजवादी मोर्चा २८ महिनापछि औपचारिक रूपमा विघटन भएको छ । मोर्चा स्थापना गरिएको उद्देश्य समाजवादी क्रान्तिको आधार तयार पार्ने, राष्ट्रिय एजेन्डामा समान धारणा बनाउन र भविष्यमा पार्टी एकता सुनिश्चित गर्नु थियो । तर मोर्चामा रहेका तीनवटा पार्टीले अब एकता प्रक्रियामा सहभागी भइसकेका कारण मोर्चाको औचित्य समाप्त भएको कार्यदलका पूर्वसदस्य गङ्गानारायण श्रेष्ठले बताए ।

श्रेष्ठका अनुसार, “समाजवादी मोर्चामा सहभागी तीन दल मिलेर नेपाली कम्युनिस्ट पार्टी गठन भएकाले मोर्चा स्वतः विघटन जस्तै भएको छ । मोर्चाको औचित्य नै समाप्त भइसकेको छ ।”

समाजवादी मोर्चा २०८० साल असार ४ गते पूर्व नेकपा माओवादी केन्द्र, नेकपा एकीकृत समाजवादी, उपेन्द्र यादव नेतृत्वको जनता समाजवादी पार्टी र विप्लव नेतृत्वको नेपाल कम्युनिस्ट पार्टीबीच गठन भएको थियो । पछि जसपा विभाजन भएपछि २०८१ साल साउन १ गते मोर्चाबाट बाहिरिएको थियो भने सोही दिन महिन्द्र राय यादव नेतृत्वको नेपाल समाजवादी पार्टी मोर्चामा सामेल भएको थियो । मोर्चाले ५५ जिल्लामा र दुई सय पालिकामा संगठन विस्तार गरेको थियो । काठमाडौँमा दुई पटक ठूला विरोधसभा आयोजना गर्नुका साथै सातै प्रदेशमा सन्देशसभा पनि गरेको थियो ।

मोर्चाका संयोजक नेकपाका महासचिव नेत्रविक्रम चन्द विप्लवले मोर्चा गठनको उद्देश्य पुष्पलालले बनाएको जस्तै एउटै कम्युनिस्ट केन्द्र निर्माण गर्नु भए पनि मोर्चा सफल हुन नसकेको बताए । कात्तिक २० गते काठमाडौँमा आयोजित सभालाई सम्बोधन गर्दै उनले भने, “पुष्पलालले बनाएको जस्तै एउटै कम्युनिस्ट केन्द्र बनाउनुपर्ने नेकपा हो । हाम्रो नीति अनुसार समाजवादी मोर्चासँग सहकार्य गर्‍यौं। तर समाजवादी मोर्चा देशव्यापी स्तरमा चल्न सकेन । मोर्चा सडकमा जानुपर्थ्यो, दलाली, भ्रष्टाचार र राष्ट्रघातविरुद्ध लड्नुपर्थ्यो । तर समाजवादी मोर्चा शिथिल भयो ।”

यसअघि, माओवादी, एकीकृत समाजवादी लगायत १० वाम दलले कात्तिक १९ गते पार्टी एकता घोषणा गरेका थिए । विप्लव, माओवादीबाट अलग भएका जनार्दन शर्मा र पुनर्गठित एकीकृत समाजवादीका संयोजक घनश्याम भुसालबीच वामपन्थी ध्रुवीकरणको सहमति पनि हस्ताक्षर गरिएको छ ।