खोज

गुल्मी, २३ कार्तिक ।

गुल्मीमा अव्यवस्थित रूपमा पालिएका सुँगुर तथा बङ्गुरको व्यवस्थापन गर्न सुरु गरिएको छ ।

जिल्लाको रेसुङ्गा नगरपालिकाले नगर क्षेत्रभित्र अव्यवस्थित रूपमा घरमा पालिएका सुँगुर तथा बङ्गुर कारण वातावरण प्रदूषण र जनस्वास्थ्यमा गम्भीर असर परेको भन्दै त्यसको व्यवस्थापन तथा स्थानान्तरण अभियान सञ्चालन गरेको हो ।

नगरपालिकामा प्राप्त लिखित तथा मौखिक जनगुनासो, प्राविधिक प्रतिवेदन र यसअघि भएका निर्णयका आधारमा तिनको उचित व्यवस्थापनका लागि अभियान सञ्चालन गरिएको रेसुङ्गा नगरपालिकाका प्रमुख प्रशासकीय अधिकृत बाबुराम पल्लीले बताए ।

नगरपालिकाले अभियानलाई व्यवस्थित बनाउन जनप्रतिनिधि, नगरपालिका कर्मचारी, स्थानीय टोल विकास संस्थाका प्रतिनिधि, सामाजिक अभियन्ता र सरोकारवालाहरूको संयुक्तेत टोली समेत परिचालन गरेको जनाएको छ ।

घर आँगन, नालाको छेउछाउ र बस्तीभित्र अनियमित रूपमा सुँगुर पालन गर्दा दुर्गन्ध, बढ्ने र रोग फैलिने जोखिम बढेको भन्दै उक्त समस्यालाई दीर्घकालीन रूपमा समाधान गर्नका लागि अभियान सञ्चालन गरिएको नगरपालिकाले जनाएको छ ।

नगरपालिकाले अभियानको क्रममा खटिएका टोलीका सदस्यहरूमाथि केही व्यक्तिहरूले गालीगलौज गर्ने र हातपात गर्न खोज्ने जस्ता अभद्र व्यवहार गरेको भन्दै त्यस्ता अवाञ्छित गतिविधि नगर्न र टोलीलाई सहयोग गर्न सबैमा अनुरोध गरेको छ ।

नगरपालिकाले अभियानको अवज्ञा गर्ने र कार्य क्षेत्रमा खटिएका टोलीमाथि अवरोध पु¥याउने व्यक्तिहरूमाथि विद्यमान कानुन अनुसार कारबाही गरिने चेतावनी समेत दिएको छ ।

रेसुङ्गा नगरपालिकाले सबै नागरिकलाई वातावरणमैत्री एवं स्वच्छ र स्वस्थ नगर बनाउनका लागि सुँगुर व्यवस्थापन अभियानमा सहयोगको लागि अनुरोध गरेको छ ।