कतार, २२ कात्तिक ।
नेपालको सगरमाथादेखि अन्टार्टिका सम्मको बिश्व यात्रामा निस्केका साहसी युवा विश्व साईकल यात्री निरञ्जन अर्याललाई कतारमा सम्मान गरिएको छ ।
“जलवायु सचेतना र मानिसका जीवनका मूल्य, मानसिक शान्ति र सकारात्मक सोचप्रति सचेत गराउने मुख्य उद्धेश्य” बोकेर दोश्रो चरणको भ्रमणमा कतारमा रहेका यात्रीलाई गैरआवासीय नेपाली सङ्घ राष्ट्रिय समन्वय परिषद् कतारले शुक्रवार एक कार्यक्रमका बिच उनको साहस र देशको नाम विश्व मञ्चमा चिनाउन गरेको योगदानप्रति कदर गर्दै अर्याललाई खादा ओढाएर सम्मान पत्र सहित सम्मान गरिएको हो ।
सम्मानपछि बोल्दै अर्यालले कतारको नेपाली समुदायको मेरुदण्ड गैरआवासीय नेपाली सङ्घ राष्ट्रिय समन्वय परिषद् कतारले दिएको साथ र सम्मानले आगामी दिनको यात्रामा आफूलाई थप ऊर्जा थप्ने र प्रेरणा मिल्ने बताए ।
उनले पहिलो चरणमा थाइल्यान्ड लाओस्, कम्बोडिया,चीन मलेसिया,सिगांपुर र भारत गरेर आठ वटा देश भ्रमण गरिसकेको र दोस्रो चरणमा साउदी अरबको भ्रमण सकेर उनी कतार आइपुगेको जानकारी दिए । कतार भ्रमणपछि आगामी महिनामा ओमन हुँदै अफ्रिकी मुलुक तर्फको यात्रा जारी रहने अर्यालले बताए ।
विश्वका सबै जसो देशहरूमा साईकल यात्रामा भ्रमण गरेर अन्तर्राष्ट्रिय स्तरमा जलवायु परिवर्तन र वातावरणीय चुनौतीप्रति सचेत बनाउने र आफ्नो राष्ट्रलाई विश्वमाझ चिनाउने आफ्नो उद्देश्य रहेको बताउँछन् ।
लामो दुरीको यात्रामा फरक-फरक देशका फरक नियम कानुन,सडक र यातयातहरु सँगै आर्थिक चुनौती मुख्य समस्या छ उनले थपे । यात्रामा विभिन्न बाधा अप्ठ्याराहरूलाई सामना गर्दै आफ्नो सपना पूरा गर्ने यात्रीको लक्ष्य रहेको छ ।
गैरआवासीय नेपाली सङ्घका अध्यक्ष कृष्ण पन्थीले अर्यालको हिम्मत र साहसको उच्च प्रशंसा गर्दै यो प्रयास प्रेरणादायी समेत रहेको बताए । पन्थीले देशको झन्डा बोकेर राष्ट्रको परिचय फैलाउन हिँडेका अर्याल लाई प्रवासमा रहेका नेपालीहरूले सहयोग गरिदिन सबैलाई आग्रह समेत गरे । यस्ता यात्राले नेपाललाई अन्तर्राष्ट्रिय स्तरमा चिनाउन थप मद्दत पुग्ने बताउदै विश्वको जुनसुकै देशमा पनि समस्या परेमा आफुलाई सम्पर्क गर्न आग्रह गर्दै बिश्व सफल यात्राको शुभकामना समेत दिए ।
२२ मंसिर २०८२, सोमबार
