खोज

सुनवल, २२ कार्तिक ।

रामग्रामका विभिन्न पूर्वाधार विकासमा सहयोग गर्दै आएको दातृ निकाय विश्व बैङ्कले रामग्राम स्तूप क्षेत्रको प्रवर्द्धनमा चासो देखाएको छ ।

स्थानीय स्तरमा रोजगारी सृजना र स्तूपको विकास र प्रवर्द्धनका लागि आवश्यक न्यूनतम आवश्यकताको परिपूर्ति गर्ने गरी विश्वबैंकले चासो देखाएको हो ।

बृहत् लुम्बिनी क्षेत्र विकास आयोजना (जिएलएडी) अन्तर्गत रामग्राम स्तूपा सहित बुद्ध स्थलको प्रवर्द्धन र रोजगारी सृजनाको सन्दर्भमा विश्वबैंकको परियोजना टोलीले रामग्रामका जनप्रतिनिधि सहित सरोकारवाला संग छलफल गरेको छ ।

रामग्राम नगरपालिकाका नगर प्रमुख धनपत यादवको अध्यक्षतामा भएको छलफलमा ग्रेटर लुम्बिनी एरिया डेभलपमेन्ट प्रोजेक्टका टास्क टिम लिडर ईल्याड शेनफेल्डले रामग्राममा पर्यटकलाई बढी भन्दा बढी समय बिताउन गर्नुपर्ने कार्यका विषयमा छलफल गरेका थिए ।

सो क्रममा नगर प्रमुख यादवले नगरपालिकाले पनि स्तुपाको प्रवर्द्धनका विभिन्न कार्यक्रम सुरुवात गरेको र पर्यटकको बसाइँ लम्ब्याउन ध्यान केन्द्र र आवास निर्माणको आवश्यकता रहेकोमा जोड दिए ।

स्थानीयलाई पर्यटक केन्द्रित गरेर स्थानीय उत्पादनको बिक्री वितरणमा सहभागी गराउन आवश्यक रहेकोमा पनि उनले जोड दिए । सो क्रममा विश्व बैङ्कको परियोजना टोलीले रामग्रामको आवश्यकता र पर्यटकको चाहना तथा न्यूनतम पूर्वाधार निर्माणको विषयमा चासो राखेको थियो ।

सो विषयमा दुवै पक्षले आन्तरिक तयारी गरेर आवश्यक योजना निर्माण गरी परियोजना सञ्चालन गर्ने गरी आजको छलफल सकिएको प्रमुख प्रशासकीय अधिकृत भूपेन्द्र पाण्डेयले जानकारी दिए ।

रामग्राम स्तुपा सहित बुद्ध सँग सम्बन्धित पर्यटकीय स्थलमा पर्यटक बढीभन्दा बढी भित्र्याउने र स्थानीयलाई उद्यमी बनाउने उद्देश्यले विश्व बैङ्कले सङ्घीय सरकारको बृहत् लुम्बिनी क्षेत्र विकास आयोजनामा लगानी गर्दै छ ।

जसका लागि स्थानीय तहका सरोकारबालाबिच छलफल हुँदै आएको छ । यसअघि पहिलो चरणमा भएको छलफलमा उद्योगी व्यवसायी, पत्रकार, विभिन्न सङ्घ संस्थाका प्रमुख, जनप्रतिनिधि लगायत सरोकारवालाहरूले पर्यटन प्रर्वद्धन सँगै स्थानीय स्तरमा कसरी उद्यम सृजना गर्न सकिन्छ भन्ने विषयमा सुझाव प्रस्तुत गरेका थिए ।

पर्यटकलाई रामग्राम स्तुपा लगायतका क्षेत्रमा कसरी बढी समय व्यथित गर्ने वातावरण बनाउने र स्थानीय उत्पादनको पनि प्रवर्द्धन हुन सकोस् भन्ने उद्देश्यले परियोजना सञ्चालन गर्न लागिएको रामग्राम नगरपालिकाका प्रशासकीय अधिकृत खेमराज ढकालले बताए ।

सरकारले गौतम बुद्ध जन्मिएको स्थान लुम्बिनीलाई ‘बृहत् लुम्बिनी विकास’ नामको नयाँ योजनासहित लुम्बिनी सांस्कृतिक नगरपालिका, कपिलवस्तु, देवदह र रामग्राम नगरपालिकाको बृहत्तर विकासका लागि परियोजना सञ्चालन गर्न लागेको हो । रामग्राम स्तूप गौतम बुद्धको एक मात्र सिङ्गो अस्थीधातु सुरक्षित रहेको स्थल हो ।