खोज

रूपन्देही ।

बिरामीको सेवामा २४ सै घन्टा खटिने रूपन्देहीका एम्बुलेन्स चालकहरूले रगत अभावका कारण कुनै पनि बिरामीको मृत्यु नहोस् भन्ने उद्देश्यले बुटवलमा एक दिने रक्तदान कार्यक्रम आयोजना गरेका छन्।

संयुक्त एम्बुलेन्स चालक संघ नेपाल रूपन्देही शाखाले आयोजना गरेको उक्त रक्तदान कार्यक्रममा करिब ४० युनिट रगत संकलन गरिएको संघले जनाएको छ।

कार्यक्रममा बोल्दै संयुक्त एम्बुलेन्स चालक संघ नेपालका केन्द्रीय महासचिव मुक्ति काफ्लेले बिरामीको सेवा गर्नु मात्र नभई उनको उपचारमा सहजता होस् भन्ने उद्देश्यले संघले हरेक वर्ष रक्तदान कार्यक्रम आयोजना गर्दै आएको बताए। उनले भने, “हामी एम्बुलेन्स चालकहरू निरन्तर बिरामीको सेवामा छौं। तर कहिलेकाहीँ रगत अभावका कारण बिरामीलाई समस्या पर्ने भएकाले यो पहल गरिएको हो।”

त्यस्तै, रूपन्देही जिल्ला शाखाका अध्यक्ष मनु गुरुङले एम्बुलेन्स चालकको पेशा आफैंमा मानवीय र जिम्मेवार पेसा भएको बताउँदै बिरामीको जीवनरक्षामा योगदान पुर्‍याउने हेतुले नियमित रूपमा रक्तदान कार्यक्रम सञ्चालन गर्दै आएको जानकारी दिए। उनका अनुसार, बुटवल र आसपासका क्षेत्रहरूमा रगतको अभाव हुने गरेकोले यस कार्यक्रमले रगत आपूर्तिमा सहयोग पुग्नेछ।

कार्यक्रमका संयोजक वासुदेव रेग्मी, वरिष्ठ उपाध्यक्ष घरबहादुर धरीकार, तथा सचिव धनबहादुर मगरले पनि रक्तदानको महत्वबारे प्रकाश पारेका थिए। उनीहरूले भने, “रगतदान नै जीवनदान हो, यसले अरूको मात्र होइन, आफ्नै स्वास्थ्यका लागि पनि लाभदायक हुन्छ।”

संघले आगामी दिनमा पनि यस्ता मानवीय कार्यलाई निरन्तरता दिने प्रतिवद्धता जनाएको छ।
रक्तदान कार्यक्रममा सहभागी सबै एम्बुलेन्स चालकहरूले समाजमा सेवा भावना र मानवताको सन्देश फैलाएको आयोजकहरूले बताएका छन्।