खोज

सल्यान, २१ कार्तिक ।

सल्यानमा नेपाल प्रहरीको नेतृत्वमा गरिब र बेसहारा परिवारका लागि घर तथा सार्वजनिक संरचना निर्माण गरिएको छ ।

जिल्ला प्रहरी कार्यालय सल्यानले अपराध नियन्त्रण, शान्ति, सुरक्षाका जिम्मेवारीसँगै आवासविहीन, जीर्ण आवास भएकाहरूको नयाँ आवास निर्माण, विद्यालय, पुल निर्माण तथा सडक मर्मत सम्भार जस्ता सामाजिक कामलाई पनि प्राथमिकता दिएको हो ।

हालसम्म गरिब र बेसहारा परिवारका लागि चार वटा घर, विभिन्न नदी तथा खोलाहरूमा सात वटा काठे पुल निर्माण गरिएको जिल्ला प्रहरी कार्यालय सल्यानका प्रमुख प्रहरी नायब उपरीक्षक डा. हेमबहादुर केसीले बुटवल टुडेलाई जानकारी गराए ।

यसका साथै शारदा नगरपालिकामा सामुदायीक विद्यालयको जीर्ण भवन भत्काएर नयाँ निर्माण भइरहेको र अर्को एक विद्यालय भवन पनि निर्माण कार्य तत्काल सुरु गरिने उनको भनाई छ । यस अघि प्रहरी नायब उपरीक्षक केसीको नेतृत्वमा जिल्लाका विभिन्न क्षेत्रमा जोखिमयुक्त ३५ किलोमिटर बढी सडक मर्मत गरिएको जिल्ला प्रहरी कार्यालयले जनाएको छ ।

बिहीबार बनगाड कुपिण्डे नगरपालिका–९ ठन्डारामा बेसहारा ७६ वर्षीया वृद्धा अमृता परियारको घर उद्घाटन गरिएको छ । ३५ वर्षकै उमेरमा श्रीमान् र दुई छोरा गुमाएकी परियारले जङ्गलको बिचमा खरको घरमा एक्लै जीवन बिताउँदै आएकी थिइन् ।

जिल्ला प्रहरी कार्यालय सल्यान र समाजसेवी मधुसूदन सिजवालको सहकार्यमा नयाँ घर निर्माण भएपछि ८६ वर्षीय बिजुलीप्रसाद सेजवालले उद्घाटन गरेका थिए । यसअघि बनगाड कुपिन्डे नगरपालिका–९ रातामाटाकी ५९ वर्षीया भगी विकको नयाँ घर पनि निर्माण गरिएको थियो ।

गत असोज ४ गते साँझ अचानक आगलागीमा परेर उनको घर खरानी भएको थियो । भात पकाउँदै गरेकी भगी र आँगनमा बसेका श्रीमान् ढोले विक छिनभरमै बेसहारा बनेका थिए । छोरा नभएका र चार छोरी विवाह गरेर गएकाले उनीहरूलाई संरक्षकको अभाव थियो ।

तर, जिल्ला प्रहरी कार्यालय सल्यानका प्रमुख प्रहरी नायब उपरीक्षक डा. केसीको नेतृत्वमा प्रहरी, स्थानीय सरकार र समुदायले भत्किएकै ठाउँमा नयाँ घर निर्माण गरिदिएका थिए । बागचौर नगरपालिका–८ की ८० वर्षीया एकल महिला नोखा भण्डारीको चर्किएको र जोखिमपूर्ण घर पनि प्रहरीकै नेतृत्वमा नयाँ बनाइएको छ ।

नेपाल प्रहरी कानुन कार्यान्वयन र अपराध नियन्त्रणमा मात्रै सीमित हुने संस्था नभएको भन्दै डा. केसीले नागरिकको सुख दुःखमा प्रहरीले हातेमालो गर्ने बताए । उनले स्थानीय सामग्रीहरूको अधिकतम प्रयोग गरेर भौतिक संरचना निर्माण गरिएको पनि बताए ।

शारदा नगरपालिका– ११ तल्लो स्यालास्थित बाल कल्याण आधारभूत विद्यालयको नयाँ ५ कोठे भवन निर्माणको काममा पनि दैनिक ५० जना प्रहरी जनशक्ति खटिरहेको केसीले जानकारी दिए ।

यो विद्यालय भवन निर्माणमा शारदा नगरपालिकाका मेयर प्रकाश भण्डारी पनि खटिरहेका छन् । अभियानमा मेयर भण्डारी र प्रहरी प्रमुख डा. केसी स्वयंले ढुङ्गा बोक्ने, ट्याक्टर चलाउने र ढुङ्गा फाल्ने कार्यमा सहभागी भएका छन् ।

जिल्ला प्रहरी कार्यालयले लागू औषध नियन्त्रणका लागि पनि विशेष अपरेसन चलाइएको जनाएको छ । लागू औषध बेचबिखन, ओसारपसार वा सेवनमा संलग्नहरूमाथि र अन्य अपराध नियन्त्रणका लागि कडाइका साथ लागेको सल्यान प्रहरीले जनाएको छ ।