खोज

बुटवल, २१ कात्तिक ।

मानव अधिकार तथा शान्ति समाज जिल्ला शाखा रुपन्देहीको २६औं साधारणसभा सम्पन्न भएको छ । साधारणसभा नेपाल पत्रकार महासंघ रुपन्देहीको सभाहलमा सम्पन्न भएको हो ।

कार्यक्रमका प्रमुख वक्ता तथा शान्ति समाजका पूर्व केन्द्रीय सभापति गोविन्द खनालले जेन्जी आन्दोलनका क्रममा भदौ २३ गते राज्यद्वारा निहत्था बालबालिकामाथि भएको बर्बर हत्या र भदौ २४ गते अराजक तथा आपराधिक समूहद्वारा व्यक्तिगत र सार्वजनिक सम्पत्तिमाथि गरिएको आगजनी, तोडफोड र कुटपिटका घटनाप्रति गहिरो दुःख व्यक्त गरे । उनले ती घटनाको निष्पक्ष छानबिन गरी दोषीमाथि कानूनी कारबाही गर्न माग गर्दै फागुन २१ मा हुने भनिएको निर्वाचनका लागि अझै पनि विश्वसनीय वातावरण तयार नभएको बताए । साथै, समयमै निर्वाचन सम्पन्न गरी देशलाई अन्धकारतर्फ जानबाट जोगाउनुपर्नेमा उनले जोड दिए ।

कार्यक्रमका पर्यवेक्षक तथा शान्ति समाजका केन्द्रीय महासचिव प्रकाश शाहीले शान्ति समाजले विगतमा देश र कालपरिस्थितिको विश्लेषण गर्दै राजनीतिक दल र नेताहरूलाइ समयमै सचेत हुन आग्रह गरेको तर त्यसलाई बेवास्ता गर्दा देशमा अकल्पनीय अवस्था सिर्जना भएको बताए ।

नेपाल पत्रकार महासंघका केन्द्रीय सदस्य रामराज पोखरेलले मुलुक अझै पनि जटिल अवस्थाबाट गुज्रिरहेको उल्लेख गर्दै राष्ट्रिय चुनौती समाधानमा शान्ति समाजको भूमिका अत्यावश्यक रहेको बताए ।

शान्ति समाजका केन्द्रीय सचिव डीपी खनालले देशलाई संकटबाट निकाल्न सबै पक्ष जिम्मेवार हुनुपर्नेमा जोड दिए ।
नेपाल पत्रकार महासंघ रुपन्देहीका अध्यक्ष दिनेश पाण्डेले मानव अधिकार उल्लंघन गर्ने र लोकतन्त्र विरोधी तत्वलाई निषेध गर्नुपर्ने धारणा राखे ।

राष्ट्रिय मानव अधिकार आयोग लुम्बिनी प्रदेश कार्यालयका प्रमुख सन्तोष आचार्यले मानव अधिकारको संरक्षणका लागि शान्ति समाजले खेलेको सक्रिय भूमिकाको प्रशंसा गर्दै आयोग सधैं सहयोगी रहिरहने बताए ।

बार एशोसिएसन बुटवलका अध्यक्ष गोविन्द मरासिनीले नागरिकहरूले अधिकारका साथै कर्तव्यको पाठ पनि सिक्नुपर्नेमा जोड दिए ।

साधारणसभामा शान्ति समाजका केन्द्रीय सदस्य लालहरि पाण्डे, पूर्व सभापति कृष्ण पराजुली, निवर्तमान सभापति कृष्ण भट्टराई, संस्थापक सभापति महेन्द्र थापा, सुर्खेत सभापति दीपक गौतम, रिपोर्टर्स क्लब लुम्बिनीका अध्यक्ष रामकुमार क्षेत्री, स्वयंसेवी रक्तदाता रुपन्देहीका अध्यक्ष कृष्ण चौहान क्षेत्री, जिल्ला सदस्य सीता पौडेल लगायतले शान्ति समाजको सक्रियता अझै सान्दर्भिक र आवश्यक रहेको उल्लेख गरे ।

जिल्ला सभापति अर्जुन ज्ञवालीले देशको वर्तमान संकट समाधानका लागि नागरिक आकांक्षा, स्वतन्त्रता र सर्वोच्चतालाई इमानदारीपूर्वक आत्मसात गर्दै सबै पक्षले योगदान गर्नुपर्नेमा जोड दिए । उनले हिंसात्मक गतिविधि रोक्न, मानव अधिकार, शान्ति, लोकतन्त्र, अहिंसा, सामाजिक सद्भाव र सहिष्णुता प्रवद्र्धनमा सबै एकताबद्ध हुनुपर्ने बताए ।

साधारणसभामा उपसभापति कृष्ण पाण्डे, सचिव लिलाधर लुइटेल लगायतले पनि बोलेका थिए । कार्यक्रममा सभापति ज्ञवालीले प्रस्तुत गरेको वार्षिक प्रतिवेदन तथा कोषाध्यक्ष मोहनिलाल न्यौपानेले प्रस्तुत गरेको लेखा प्रतिवेदन छलफलपछि सर्वसम्मत रूपमा पारित गरिएको थियो ।

कार्यक्रममा शान्ति समाजका सदस्यहरू, सञ्चारकर्मी, व्यवसायिक संस्था, नागरिक अगुवा तथा अभियन्ताहरूको उल्लेख्य उपस्थिति रहेको थियो ।