खोज

रोल्पा, २१ कार्तिक ।

जब–जब बर्सात सुरु हुन्छ तब रोल्पाको परिवर्तन गाउँपालिका वडा नं.३ बागमारामा रहेको पाछाबाङ खोलाको विषयले सामाजिक सञ्जाल तातिने गर्छ । यसको मुल कारण हो पाछावाङ खोला पुल निर्माणको विषय ।

यस विषयमा सरोकारवालाहरूको ध्यानाकर्षण गर्न परिवर्तन गाउँपालिकामा गठित जेन्जी समूहले अन्तरक्रिया कार्यक्रम आयोजना गरेको छ । सो कार्यक्रममा बोल्ने वक्ताहरूले पाछावाङ खोलामा जसरी पनि पुल बन्नुपर्ने धारणा राखेका थिए ।

परिवर्तन गाउँपालिका–३ बागमारा प्रगतिशील ब्याडमिन्टन क्लबको हलमा उक्त अन्तर्क्रिया कार्यक्रम आयोजना गरिएको थियो । लामो समय बितिसक्दा सम्म पक्की मोटरेबल पुल निर्माण हुन नसक्दा यस विषयले चर्चा पाउने गरेको छ ।

पुल निर्माण नहुनुको मुख्य कारण राजनीतिक खिचातानी भएको स्थानीयहरूको भनाइ छ । यसका साथै पुल निर्माणका लागी जग्गा धनीले जग्गा नदिनु पनि अर्को कारण भएको उनीहरूको भनाइ छ ।

यही विवादित विषयले पटक पटक विनियोजन भएको बजेट समेत काम नभई फिर्ता हुने गरेको बताइन्छ । यही विषयलाई मुख्य विषयवस्तु बनाएर जेन्जी समूहले उक्त अन्तर्क्रिया कार्यक्रमको आयोजना गरेको बताइएको छ ।

परिवर्तन गाउँपालिका वडा नं.३ बागमारा बजार पाछाबाङ खोला पुल निर्माणका लागि विभिन्न समयमा बजेट विनियोजन भए पनि कार्यान्वयन हुन नसकी बजेट फिर्ता हुनुको कारण के हो ? पुलको अभावमा स्थानीयहरूले झेल्नु परेका समस्याहरू के के हुन ?

चालू आर्थिक वर्षमा सङ्घीय सरकार र प्रदेश सरकार बाट के कति बजेट विनियोजन भएको हो ? पुल निर्माण कार्य अति आवश्यक हुँदा हुँदै पनि के कति कारणले ढिलाइ भइरहेको छ ? उक्त पुल निर्माणको क्रममा देखिने चुनौती सामु स्थानीय सरोकारवालाहरूको भूमिका के रहन्छ भन्ने विषयमा अन्तरक्रिया गरिएको थियोे ।

जेनजी समूह परिवर्तन गाउँपालिका संयोजक चुडामणि केसीको अध्यक्षतामा भएको अन्तरक्रिया कार्यक्रममा परिवर्तन गाउँपालिका अध्यक्ष सुकबहादुर बुढामगर, परिवर्तन गाउँपालिका प्रवक्ता समेत रहेका वडा नं. २ का वडाध्यक्ष हरिप्रसाद बुढामगर, परिवर्तन गाउँपालिका–३ का वडाध्यक्ष खिमविक्रम चन्द रहेका थिए ।

अन्तर्क्रिया कार्यक्रमको अन्य अतिथिहरूमा परिवर्तन गाउँपालिका वडा नंं.वडा नं. ५ का वडाध्यक्ष दिलबहादुर वली, भुमे गाउँपालिका–९ रुकुम पूर्वका वडाध्यक्ष बिनोद बुढामगर, स्थानीय जनप्रतिनिधि, राजनीतिक दल, बुद्धिजीवी, व्यापारी लगायतको उपस्थित रहेको थियो ।

अन्तरक्रिया कार्यक्रममा वोल्ने वक्ताहरूले जसरी पनि पुल निर्माण हुनुपर्ने धारणा राखेका थिए । बर्सातको समयमा पाछाबाङ खोला पुन नबन्दा स्थानीय जनता र यातायात व्यवसायीले लामो समय देखी समस्या भोग्नु परेको धारणा व्यक्त गरिएको थियो ।

चालु आर्थिक वर्ष सो पुल निर्माणका लागी सङ्घीय सरकारबाट ३ करोड बजेट विनियोजन भए पनि जेन्जी आन्दोलन पछि गठित सरकारले सो बजेट कटौती गरेको थियो । कटौती भएको बजेटलाई कटौती हुन नदिन पहल गर्न र पुल निर्माणका सर्वदलीय समिति समेत गठन भएको छ । पुल निर्माणका लागी करिब ८ करोड रकम बराबरको डिपिआर भएको बताइएको छ ।