खोज

काठमान्डौ, २० कार्तिक ।

जेनजी आन्दोलनकी अभियन्ता रक्षा बमले निहत्था विद्यार्थीमाथि गोली चलाउन आदेश दिने तानाशाह आज पनि स्वतन्त्र रूपमा हिँडिरहेको भन्दै तीव्र आक्रोश व्यक्त गरेकी छिन् ।

कसैको नाम उल्लेख नगरी उनले लेखेकी छिन्– “निहत्था विद्यार्थीहरूमाथि गोली बर्साउने आदेश दिने तानाशाह खुलेआम घुम्दै छ । अन्तरवार्ता दिदैछ । अझै पनि चुट्किला सुनाएर दुनियाँ हसाईरहेको छ। मानिसहरू उसको चुट्किला सुनेर ताली पिटिरहेका छन् । खासमा मानिसहरू चुट्किलामा ताली बजाइरहेका छैनन्, उनीहरू त निरङ्कुश तानाशाहको हर्षबढाई गरिरहेका छन् ।”

“दिक्क लाग्छ, अचम्म लाग्छ । यो अट्टहासको साक्षी कसरी बस्न सकेका होलान् मानिसहरू रु एउटा दम्भी तानाशाहको भाषणमा ताली बजाएर घर फर्किएकाहरू आफ्नो वरिपरि हुर्किरहेका ज्यानजीहरूसँग आँखा जुधाएर कुरा गर्न पो कसरी सकिरहेका होलान्  ? “उनले भनेकी छिन् ।

उनले चेतावनी दिँदै भनेकी छिन्– “हाम्रा साथीहरूको रगत सडकमा अझै सुकेको छैन । चिसो रातहरूमा घाइते साथीहरूको शरीर झन् बढी कटकट्याएर दुखिरहेको छ । ती प्रत्येक रगतका थोपाले न्याय पाउनै पर्छ । यी चिसा रातहरूमा नओभाई निदाउन सङ्घर्षरत आमाहरूका आँखाले न्याय पाउनै पर्छ। दुखिरहेका प्रत्येक घाउहरूले न्याय पाउनै पर्छ । हामी हाम्रो खातिर न्याय कुरिरहेका छौँ ।”