खोज

काठमाडौं, २० कात्तिक ।

युवा तथा खेलकुद मन्त्रालयअन्तर्गतको नेपाल स्काउट राष्ट्रिय प्रधान कार्यालयले आफ्नै स्वामित्वमा रहेको जग्गा तथा सो जग्गामा निर्माण भएका संरचनाका प्रयोगकर्तालाई सात दिनभित्र बहालको बक्यौता रकम तिर्न ताकेता गरेको छ ।

अन्यथा, उक्त जग्गामा निर्माण भएका सम्पूर्ण भवन तथा सामान जफत गरिने चेतावनी स्काउटको प्रधान कार्यालयले दिएको छ ।

आज प्रकाशित स्काउटको सार्वजनिक सूचनाअनुसार, स्काउटको जग्गा र त्यहाँका संरचना खड्का ल्याण्ड डेभलपमेन्ट प्रालिले भाडामा सञ्चालन गर्दै आएको छ । तर, भाडा चुक्ता नगर्दा स्काउटलाई अपूरणीय क्षति पुगेको उल्लेख छ । त्यसैले सात दिनभित्र बहालको बक्यौता रकम तिर्न अन्तिम मौका प्रदान गरिएको सूचनामा जनाइएको छ ।

सूचनामा भनिएको छ, ‘उक्त समयावधिभित्र बहाल तिर्न नआए नेपाल स्काउट र खड्का ल्याण्ड डेभलपमेन्ट प्रालिबीच भएको सम्झौताको बुँदा नं. ४ बमोजिम तथा मुलुकी देवानी संहिता, २०७४ को परिच्छेद १२ दफा ६१९, ६२० (४) र ६२१ बमोजिम जग्गामा निर्माण भएका सम्पूर्ण भवन तथा सामान जफत गरिनेछ । साथै, उक्त जफतबाट समेत नपुग हुने रकम घरघराना वा जायजेथाबाट असुल–उपर गरिने व्यहोरा समेत सूचित गरिन्छ ।’

स्काउटको जग्गा कांग्रेस नेता एवम् पूर्व ऊर्जामन्त्री दीपक खड्काको स्वामित्वमा रहेको कम्पनी खड्का ल्याण्ड डेभलपमेन्ट प्रालिले कब्जा गर्दै आएको आरोप लाग्दै आएको छ ।