खोज

बुटवल ।

रोट्याक्ट क्लब अफ बुटवल साउथको आयोजनामा देविनगर स्थित रङ्गशालामा जारी प्रथम बुटवल फिस टनेल एन्ड दुबई सिटी सांस्कृतिक रमाइलो मेलामा दर्शकहरूको आकर्षण बढ्दै गएको छ ।

मेलाको प्रमुख आकर्षणको रूपमा रहेको जलपरी र फिस टनेलमा दर्शकहरूको आकर्षण बढ्दै गएको हो । पानीमा जलपरी पौडी रहेको हेर्न दैनिक हजारौँको सङ्ख्यामा दर्शकहरू मेला पुग्ने गरेको आयोजकले जनाएको छ ।

मेला व्यवस्थापन समितिका सांस्कृतिक संयोजक शङ्कर काफ्लेले विदेशी मुलुकमा देख्न पाइने जलपरी नेपालमै पहिलो पटक बुटवलमा ल्याउँदा दर्शकहरूको उल्लेख्य उपस्थिति भएको  बताए ।

त्यस बाहेक दुबई सिटी र बैष्णुदेवीको मन्दिर पनि दर्शकहरूको आकर्षणको रूपमा रहेको छ । जलपरी अवलोकन गर्ने दर्शकका लागि २ सय रुपैयाँको टिकट कायम गरिएको छ । दिउसो ३ बजे देखि राती ९ बजे सम्म जलपरीको सो मेलामा देख्न पाइने  उनले बताए ।

कार्तिक १३ गते देखि सुरु भएको रमाइलो मेला मङ्सिर २ गते सम्म चल्ने मेला व्यवस्थापन समितिका अध्यक्ष इपल भण्डारीले बताए । स्वदेशी बस्तुको प्रवर्द्धन, कृषि एवं औद्योगिक उत्पादनमा टेवा पुराउने उद्देश्यले आयोजना गरिएको मेलाको व्यवस्थापन जय माता दी एम्युजमेन्ट इभेन्ट म्यानेजमेन्ट प्रा.लिले गरेको छ ।

बिहीबार मात्र मेलामा गायक सुमन अधिकारी, रामप्रसाद पाण्डेय, गायिका सकुन्तला गैरे लगायतका कलाकारहरूले प्रस्तुति दिएका थिए । मेलामा सोनी डान्स ग्रुपको उत्कृष्ट नृत्य समेत दर्शकले अवलोकन गरेका थिए । फागुन २१ गते शुक्रबार भने गायक चन्द्र शर्मा, धन बहादुर गुरुङ, गायिका रेनु राना मगर, हिरा थापा लगायतका कलाकारहरूको प्रस्तुति रहेन सांस्कृतिक सह संयोजक दिपु मगरले जानकारी दिए ।

मेला अवलोकनका लागि सर्वसाधारण तर्फ ५० र विद्यार्थीका लागि ४० रुपैयाँ  टिकटको व्यवस्था कायम गरिएको छ । वृद्ध, अशक्त, फरक क्षमता भएकाहरूका लागि निःशुल्क प्रवेशको व्यवस्था मिलाइएको आयोजकले जनाएको छ ।