खोज

काठमाडाैं ।

नेपाली कांग्रेसको केन्द्रीय समिति बैठकमा बिहीबार सदस्यहरूले चुनाव, महाधिवेशन र नयाँ पुस्ताको भूमिकाबारे तीव्र बहस गरेका छन्। बैठकमा फागुन २१ गते निर्वाचन नहुँदा देश नै संकटमा पर्ने चेतावनीदेखि ‘जेनजी’ पुस्ताविरुद्ध प्रतिकार गर्नुपर्ने धारणा सम्मका विषयहरू उठेका थिए।

केन्द्रीय सदस्य आनन्दप्रसाद ढुंगानाले भने, “फागुन २१ गते निर्वाचन नभए देश नै विघटन हुन्छ। अहिले कांग्रेसको प्राथमिकता महाधिवेशन होइन, चुनाव हुनुपर्छ।” उनले विशेष महाधिवेशनले पार्टीका समस्या समाधान गर्न नसक्ने दाबी गर्दै नेतृत्वको भूमिकाप्रति प्रश्न उठाए।

त्यसैगरी, केन्द्रीय सदस्य अजयकुमार चौरसियाले ‘जेनजीको महिमा गाउन छोड्नुपर्छ’ भन्दै उनीहरूको नाममा भइरहेका आन्दोलनविरुद्ध प्रतिकार गर्नुपर्ने बताए। “अन्तर्राष्ट्रिय शक्तिले जेनजीको नाममा आन्दोलन भड्काउँदा सम्पत्ति र नेताहरूका घरमा आगजनीसम्म भएको छ। त्यसैले अब जेनजीको महिमा होइन, प्रतिकार गर्नुपर्छ,” उनले भने।

बैठकमा सहमहामन्त्री महेन्द्र यादव र महामन्त्री गगन थापाबीच महाधिवेशनको मितिलाई लिएर मतभेद देखियो। केन्द्रीय सदस्य नागिना यादवले सहमहामन्त्री यादवको प्रस्ताव विधानअनुसार भएको बताइन्। उनले चेतावनी दिइन्, “यदि पार्टीले स्पष्ट अडान लिएन भने हामी अदालत जानेछौं।”

अन्य नेताहरूबीच पनि मतभेद स्पष्ट देखियो। केन्द्रीय सदस्य धना खतिवडाले चुनावअघि नै महाधिवेशन गर्नुपर्ने बताइन् भने अनिलकुमार रुँगटाले समय अभावका कारण चुनावपछि गर्न उपयुक्त हुने बताए। प्रदीपकुमार सुनुवार र एनपी साउदले भने निर्वाचन र महाधिवेशनको समय सन्तुलित ढंगले निर्धारण गर्नुपर्नेमा जोड दिए।

विनोद चौधरीले भने पार्टीमा नयाँ ऊर्जा, जोश र युवाको अनुहार देखाउन नसके चुनाव जित्न गाह्रो हुने चेतावनी दिए। “विदेशबाट फोनका आधारमा भोट खस्छ, हाम्रो भाषणले होइन। हामी नयाँ पुस्तालाई जोड्न सकेनौं भने कांग्रेस कमजोर बन्छ,” उनले भने।

त्यसैगरी, अर्जुननरसिंह केसीले नयाँ नेतृत्व विना चुनावमा गए पार्टीलाई ठूलो क्षति हुने बताए। उनले जोड दिए, “अघिल्लो महाधिवेशन हामीले ४० दिनको तयारीमै सम्पन्न गरेका थियौं। अहिले असाधारण परिस्थिति भन्दै ढिलो गर्न खोज्नु बहाना मात्र हो।”

बैठकमा अन्य सदस्यहरू—अर्जुननरसिंह केसी, एनपी साउद, मिनाक्षी झा, अमृत अर्याल, गेहेन्द्र गिरी, नैनसिंह महर, मोहन आचार्य, मञ्जुकुमारी यादव, सरस्वती अर्याल तिवारी र उर्मिला नेपाल केसी—ले पनि आफ्ना धारणा राखे।

यसैबीच, संस्थापन पक्षका केही नेताहरूले छुट्टै भेला गरी नियमित र विशेष महाधिवेशनका विवादले पार्टी कमजोर बन्ने भन्दै चुनावलाई प्राथमिकता दिनुपर्नेमा जोड दिएका छन्। उक्त भेलामा कोशी प्रदेश सभापति उद्धव थापा र भक्तपुर कांग्रेस सभापति दुर्लभ थापासहितका नेताहरू सहभागी थिए।

महामन्त्रीद्वय गगन थापा र विश्वप्रकाश शर्माले महाधिवेशनको माग अघि सारिरहेका बेला, उनीहरूले काउन्टर रूपमा चुनावमुखी अडान प्रस्तुत गरेका हुन्।