खोज

काठमान्डौ, २० कार्तिक ।

सहकारी ठगी र सङ्गठित अपराधको अभियोगमा थुनामा रहेका राष्ट्रिय स्वतन्त्र पार्टी (रास्वपा) का सभापति रवि लामिछाने र तत्कालीन गोर्खा मिडियाका सञ्चालक छविलाल जोशीको मुद्दाको सुनुवाइका लागि पेसी तोकिएको छ ।

उच्च अदालत तुलसीपुर बुटवल इजलासका न्यायाधीशद्वय बासुदेव आचार्य र ओमप्रकाश अर्यालको संयुक्त इजलासमा उनीहरूको मुद्दा सुनुवाइका लागि तोकिएको हो ।

बुटवलस्थित सुप्रिम सहकारी ठगी प्रकरणमा पुर्पक्षका लागि थुनामा रहेका लामिछानेले सहकारीमा भएको अपचलनअनुसार आफ्नो भागको बिगो रकम बुझाइसकेका थिए । तर जिल्ला अदालत रुपन्देहीका न्यायाधीश नारायण सापकोटाको इजलासले गत साउन २६ गते उनीलाई थुनामुक्त गर्न अस्वीकार गरेको थियो । उक्त आदेशविरुद्ध लामिछानेले भदौ ९ गते उच्च अदालतमा पुनरावलोकनका लागि निवेदन दर्ता गराएका थिए ।

यसअघि उच्च अदालत तुलसीपुर बुटवल इजलासले लामिछाने र जोशी दुबैको मुद्दा एउटै प्रकृतिको भएको भन्दै संयुक्त रूपमा सुनुवाइ गर्ने आदेश दिएको थियो ।

बुटवलको सुप्रिम सहकारी ठगी प्रकरणमा रविसहितका प्रतिवादीहरूविरुद्ध १० करोड ९९ लाख ३६ हजार रुपैयाँको सामूहिक बिगो कायम गर्दै अभियोगपत्र दायर गरिएको छ । लामिछानेले उक्त रकमको आफ्नो चौथाइ भाग बराबर २ करोड ७४ लाख ८४ हजार रुपैयाँ बैङ्क जमानतका रूपमा दाखिला गरेका छन् । जोशीले पनि त्यही बराबरको जमानत पेस गरेका थिए ।

तर, दुवै प्रतिवादीको हकमा उनीहरूको भागमा कति बिगो कायम हुने भन्ने स्पष्ट नहुँदा अदालतले थुनामुक्त गर्न अस्वीकार गरेको थियो ।

हाल पुर्पक्षका लागि लामिछाने र जोशी दुबै जेलमा छन् । लामिछानेलाई भैरहवा कारागारबाट ललितपुरको नख्खु कारागारमा सारिएको छ भने जोशी भने अझै भैरहवा कारागारमै रहेका छन् ।