खोज

काठमाडौँ ।

नेकपा एमालेबाट विद्रोह गर्दै चार वर्ष अघि गठन भएको माधव नेपाल नेतृत्वको नेकपा एकीकृत समाजवादी अब ‘एकीकृत’ नरहने भएको छ । पार्टी तीन टुक्रामा विभाजन भएको छ ।

अध्यक्ष नेपाल अर्थात् बहुमत नेताहरू माओवादी केन्द्रसहितका १० वाम घटकसँग पार्टी एकता प्रक्रियामा सहभागी भएसँगै पार्टी विभाजित बन्न पुगेको हो ।

अध्यक्ष माधवकुमार नेपालसहित बहुमत नेताहरू नवगठित ‘नेपाली कम्युनिस्ट पार्टी’मा सामेल भएका छन् । अध्यक्ष नेपालसँगै सम्मानित नेता झलनाथ खनाल, वरिष्ठ नेता बेदुराम भुसाल, प्रमेश हमाल, राजेन्द्र पाण्डे, प्रकाश ज्वाला, जगन्नाथ खतिवडा लगायतका नेता पनि एकता प्रक्रियामा सामेल भएका छन् ।

महासचिव घनश्याम भुसालले भने नेकपा एकीकृत समाजवादीलाई नै पुनर्गठन गरेर क्रान्तिकारी पार्टी निर्माण गर्ने अभियान चलाउने घोषणा गरेका छन् । भुसाललाई वरिष्ठ नेता घनेन्द्र बस्नेत, नेताहरू विजय पौडेल, जीवनराम श्रेष्ठ तथा दामोदर अर्याललगायतले साथ दिएका छन् ।

भुसाल पक्षले बुधबार पत्रकार सम्मेलन गरी क्रान्तिकारी पार्टी निर्माण गर्ने भन्दै आगामी मङ्सिरमा राष्ट्रिय सम्मेलन गर्ने घोषणा गरेका छन् ।

तेस्रो समूहको नेतृत्व नेतृ रामकुमारी झाँक्रीले गर्ने भएकी छन् । झाँक्री समूह अहिले कतै नगए पनि एमालेमै फर्कने सम्भावना बढी रहेको उनीहरूका अभिव्यक्तिले देखाएका छन् ।

२०७८ सालमा एमाले विभाजन गरेर नयाँ पार्टी गठन गर्न माधव नेपाललाई बलियो साथ दिएकी नेतृ झाँक्रीले बुधबार पत्रकार सम्मेलन गरेर एकीकृत समाजवादीसँगको यात्रा टुङ्गिएको घोषणा गरिन् ।